Ерөнхийлөгч Ц.Элбэгдорж эрх мэдлийнхээ хүрээнд хоёр хоногийн өмнө Өршөөлийн тухай хуулийн зарим заалтад хориг тавьсан. Тэгвэл одоо уг хуулийн авлигачдыг өршөөсөн заалтууд унах эсэх нь МАН-ын гарт  байна.

Хуулийн дагуу УИХ-ын чуулганы нийт гишүүдийн гуравны нэгийн саналаар хоригийг хүлээж авах боломжтой.Тэгэхээр одоогийн парламентын гуравны нэгийг бүрдүүлж буй МАН-ын 26 гишүүн Ерөнхийлөгчийн хоригийг дэмжчихвэл зарим заалт хүчингүй болох гээд байгаа юм.

Олон нийт МАН-ын гишүүдийг Ерөнхийлөгчийн хоригийг дуу нэгтэйгээр хүлээн зөвшөөрч дэмжинэ гэж хүлээж байна. Учир нь тус намынхан анхнаасаа Өршөөлийн хуулийг дэмжээгүй гэж хэлж ирсэн.

Тэгэхээр хэлсэн амандаа хүрч Өршөөлийн хуулийн зарим заалтад тавьсан хоригийг дэмжих байх.

Тус бүлгийн дарга С.Бямбацогт болон УИХ-ын гишүүн Ц.Нямдорж, Ерөнхий нарийн бичгийн дарга Ж.Мөнхбат нар мэдээлэл хийж “МАН анхнаасаа Өршөөлийн хуулийг дэмжихгүй байсан. Гэтэл хууль бусаар зүтгүүлсээр баталчихлаа. Анхны хэлэлцүүлэг дээр нь ороход хүч түрээд баталсан. Тэгээд эцсийн хэлэлцүүлэгт манай бүлгийн гишүүд ороогүй” гэж харамсаж ирээд л тайлбар хийж байсан. Хамгийн гол нь тэд авлигачдыг, албан тушаалтнуудыг өршөөхийг эсэргүүцэж байгаа. Харин анх удаа гэмт хэрэг үйлдсэн, хөнгөн гэмт хэрэгтэй хүн мөн хүүхэд эмэгтэйчүүдийг өршөөх ёстой гэсэн байр суурийг илэрхийлж байгаа юм. Үүгээрээ тэд Ерөнхийлөгчтэй нэг санаа зорилготой. Тэгэхээр тэд одоо Ерөнхийлөгчийн тавьсан хоригийг дэмжих л үлдээд байна. Хэрвээ ингэж чадвал уг хуулийн авлигачдыг өршөөсөн заалт унаж хэрэгсэхгүй болно.

МАН-ынхан хэлж байсан үгээ үйлдлээрээ харуулж  26 уулаа чуулганы хуралдаанд орж уг хууль дахь хориг тавьсан зарим заалтыг унагах эсэхийг олон нийт анхааралтай ажиглаж байна.

Т.Энхэлээ