“Шинэчлэлийн засгийн газар” –ыг, Н.Алтанхуягийг унагадаггүй байж хэмээн амаа барьж байгаа улс төрчид, гишүүд  олон бий. Ардын дунд ч ийм бодолтой хүн нэг биш байгаа. Учир нь “Шийдлийн засгийн газар”, Ч.Сайханбилэг өмнөхөөсөө хамаагүй дор байсны үр дагавар юм.

Харин Ч.Сайханбилэг бол өөрийнхөө толгойгоор ажилласан гэвэл эргэлзээтэй. Түүний ард хөдөлгөгч хүч нь буюу С.Баярцогт бий. Тэрбээр “Шийдлийн засгийн газар” байгуулагдангуут Ч.Сайханбилэгийг “базаж” байгаад Засгийн газрын хэрэг эрхлэх газрын дарга болж чадсан бөгөөд яг үнэндээ “Ерөнхий сайд”-ын албыг гүйцэтгэж байсан хэмээн улс төрийн хүрээнийхэн ярьдаг юм. Үнэхээр ч эхнээсээ л ардын дунд нэр хүнд муутай, эх орноосоо сая  доллар “хулгайлаад” Швейцарын банкинд нууц данс нээгээд хийчихсэн хүнийг Ч.Сайханбилэг Засгийн газрын хэрэг эрхлэх газрынхаа даргаар томилсон нь зүгээр ч нэг тохироо байгаагүй гэдгийг цаг хугацаа өөрөө гэрчилнэ.  Өөрөөр хэлбэл Ч.Сайханбилэг ямар нэг үг хэлэхэд захиалагч нь С.Баярцогт, С.Баярцогтын ард Ц.Элбэгдорж байдаг гэдгийг улс төр судлаачид ч анзаарчихсан байна. Үнэхээр энэ ч батлагдаж байгаа мэт Ч.Сайханбилэгийн хутгасан бантанг, З.Энхболд хутгачихсан мэтээр төрийн тэргүүн нь ярих болов. Гэтэл яг үнэн чанартаа Ч.Сайханбилэг, С.Баярцогт нар гол “шоучид”  гэдгийг  нийгэм ч харж байна. Ямар сайндаа  Ч.Сайханбилэг Н.Энхбаярыг нисэх дээр тосч авч байхав. Үнэндээ бол түүний энэ үйлдэл  “Ахаа намайг бодоорой” гэдэгтэй агаар нэг байсан гэвэл буруу дуугарсан л лав болохгүй юм. Ардчилсан намынхаа засаглах чадамжийг ахынхаа гарт атгуулахаар сэтгэл шулуудаад байна.

“Шийдлийн засгийн газар”-ын сиамын ихрүүдийн эрх мэдлийн “бялууг хувааж хүртээх” төрөлхийн авъяас нь хэтийдээд эдийн засгийн бэрхшээлийг даван туулах арга замаа олох бус улс төрийг тогтолцооных нь хувьд гажуудуулж, хөдлөх аргагүй балчиг намагт хутгаж орхилоо. “Загас хэрхэн модонд авирах”-ыг харах гэж Ардчилсан намын ҮЗХ-ны 53,6% нь найрагдсан байж болох ч Монголчууд бидэнд үүнийг харж хүлээж суух цаг зав алга. Уг нь бол Монголчууд бид хүн шиг амьдрах гэж, улс шиг хөгжих гэж л улс төрийн сонголт хийсэн.  Харин одоо бол буруу сонголт хийв, мордохын хазгай болов хэмээн амаа барьцгааж байна. Иймээс ардчилсан нам нэрээ цэвэрлэж авч үлдэхийн тулд 29 дахь ерөнхий сайдыг тодруулах шаардлагатай болох нь. Өөрөөр хэлбэл ард түмнийхээ сонголт, хүлээлтийн хариуд нэртэй, нөлөөтэй гэсэн бүхний захиа даалгаварт барьцаалагдчихаагүй, бодлоготой, зангарагтай боловсон хүчнээ тодруулж гажуудал, гацаанаас гарах гарцыг олох түүхэн шаардлага Ардчилсан Намын өмнө тулж ирээд байгааг хэлэх байна. Тодруулах ч гэж дээ,  угаасаа л тодруулчихсан байсан Р.Амаржаргалдаа засгийн жолоогоо атгуулж орхивол алдаанаасаа суралцаж чаддагаа нотлох сайхан боломж АН-д гараад ирж байгааг учир мэддэг нэг нь жиг жуг хийж байна. Өнөөдөр олон нийтийн сүлжээний од, овжин гацаагч, сүржин улстөрчид өөрсдийгөө дараагийн ерөнхий сайд хэмээн өргөмжлөөд, сойгоод эхэлчихсэн л байна. Түрүүчээсээ мөнгө тарааж, жиргэж, шургаад, бөөлж, ламдаад гүйж явж ч мэднэ. Энэ удаа тийм нэгнийг биш арай буурь суурьтай, барьц алдаагүй, ядаж л нийгэмд эх орондоо муу нэр, модон данс зүүгээгүй Р.Амаржаргал нь Ардчилсан намаа аварна даа...

Т.Хулан