Ерөнхийлөгчийн зөвлөхөөс эхлээд сайд хүртэл хийгээд амжсан УИХ-ын гишүүн Ц.Оюунгэрэлийг Ерөнхийлөгч Ц.Элбэгдоржийн хүн гэлцдэг.

Тэгвэл тэрбээр Ерөнхийлөгчийн эсрэг байр суурьтай байгааг хүн бүр мэдэж байгаа. Тиймээс ч сүүлийн үед Ц.Оюунгэрэл ерөнхийлөгчөөс урваж байна гэх бор шувуу нисэх боллоо.

Учир нь Ерөнхийлөгч Өршөөлийн хуулийн зарим заалтад хориг тавьж эсэргүүцэж байгаа энэ үед УИХ-ын гишүүдээс нэг хүний санал ч хэрэгтэй байгаа нь нууц биш. Тодруулбал, Ерөнхийлөгчийн гаргасан Өршөөлийн хуулийг хоригийг гишүүдийн 3/2 хувь нь дэмжвэл хориг хүчин төгөлдөр болох юм.

Гэвч гишүүд түүний хориг тавьсан асуудалд шүүмжлэлтэй хандаж байгаагаа эхнээсээ дуулгаж байгаа энэ үед түүний хүн гэгддэг Ц.Оюунгэрэл ч Ерөнхийлөгчийн эсрэг байр суурьтай байгаагаа хэвлэлээр онцолсон нь олныг гайхшруулж байна.

Ц.Оюунгэрэлийн хувьд  “Эмэгтэй гишүүний хувьд энэ албан тушаалын хэрэг дээр Ерөнхийлөгчөөс арай өөр байр суурьтай байгаа. Учир нь албан тушаалын хэрэг гээд яг ял аваад явдаг хүмүүсийн ихэнх нь эмэгтэйчүүд байдаг. Тэр тусмаа нягтлан бодогч нар байдаг. Одоо албан тушаалын хэргээр хоригдож байгаа хүмүүс дунд 17 эмэгтэй бий. Тэд бүгд нягтлан бодогч нар. Мөн ямар нэг хохиролгүй, анхнаасаа шүүхийн шийдвэр нь ч ямар ч хохирол төл гэж гараагүй. Хэрэв хохиролтой байсан бол өөрсдөө ч аль хэдийнэ төлөх байсан есөн хүн байна. Мөн хохирлоо бүрэн төлсөн гурав, дөрвөн хүн байдаг. Ер нь  ийм байдалтай жагсаалт гардаг юм билээ. Ерөнхийлөгчид АТГ ч юм уу, Ерөнхийлөгчийн зөвлөхүүд нь арай сүржигнэсэн мэдээлэл өгсөн юм болов уу гэж бодож байгаа. Бодит байдал дээр комисст нь орж ажиллаад, хоригдож байгаа хүмүүсийн жагсаалтыг аваад үзэхэд жирийн ардууд нэлээд их байна гэж би хэлэх гээд байгаа юм. Тэгэхээр хэтэрхий улс төрийн сүржин байдалд үүнийг битгий их дэвэргээсэй” гэж байр сууриа илэрхийлсэн юм.

Тэгвэл энэ нь зарим иргэдийг Ц.Оюунгэрэл Ерөнхийлөгчөөс урвасан гэх хардлагатай явахад хүргэжээ.

Тэрбээр Ерөнхийлөгчөөс “Т-Батаар хүндэт өргөмжлөл”-ийг хүртэл гардаж байсан итгэл үзүүлсэн хүмүүсийнх нь нэг.  Тэгвэл энэ удаад ерөнхийлөгчийн маш чухал шийдвэрт эсэргүүцлээ илэрхийлж байгаа түүний дүр төрх нийгэмд ийнхүү урвалтын үнэртэй мессеж түгэхэд хүргээд байгаа биз ээ.

Д.Дуулим