АН-ын бүлэг өнөөдөр хуралдаж сайдад нэр дэвшигчдээ тодорхой болгов. Тус нам Л.Эрдэнэчимэгийг Зам тээврийн, Н.Батбаярыг Сангийн, Г.Баярсайханыг Байгаль, орчин ногоон хөгжлийн сайдаар томилохоор эцсийн байдлаар тохирчээ. Харин Хөдөлмөр, Барилга хот байгуулалт, Шадар сайдын суудлыг МАХН-МҮАН-ын “Шударга ёс” эвслийн бүлэгт өгөхөөр болсон байна.

АН-ын хувьд дөрвөн сайдын суудлыг өөрсдөө авна гэж өнөөдрийг хүртэл гүрийж байсан ч эцэст нь “Шударга ёс” эвсэлд бууж өгч нэг сайдын суудлаа тэднийхэнд алдсан байна.  

АН-ынхан дотооддоо бүтэн гурван долоо хоног хэрэлдсэний эцэст олны дургүйцлийг хүргэх шийдвэрийг өнөөдөр гаргалаа. Тус нам сайдад дээрх хүмүүсийг нэр дэвшүүлсэн нь араасаа ихээхэн шүүмжлэлийг дагуулж мэдэхээр байна. Ядаж л нэр цэвэр, тулхтай, туршлагатай ганц хүн болох Я.Санжмятавыгаа нэр дэвшигчдээс “хусч” хаяаад хамгийн болж, бүтэхгүй нөхдүүдийг сайд болгохоор болжээ.

Эх сурвалжийн мэдээлж буйгаар УИХ-ын гишүүн Х.Баттулга Зам тээврийн яамыг өрөөлд алдахгүй өөрийн хүнд өгнө гэж зүтгэсээр байгаад Л.Эрдэнэчимэгийг тус яам руу явуулахаар болсон байна.

Харин УИХ-ын дарга З.Энхболд өөрийн “Шонхор” фракцаас төлөөлүүлж Г.Баярсайханыг Байгаль, орчин ногоон хөгжлийн яамны сайдад нэр дэвшүүлжээ. МҮДН-ын хувьд Н.Батбаярыг Сангийн сайдад нэр дэвшүүлжээ.

АН-ын бүлгийн хуралдаан тарсны дараа УИХ-ын гишүүн Л.Эрдэнэчимэг хуралдааны танхимаас нилээн ууртай гарч ирсэн. Үүнээс үзвэл тэрбээр бүлгийн хурал дээр хурцаар шүүмжлүүлсэн байх магадлалтай байгаа юм. Олон нийт ч түүнийг сайд болох гэж буйд ихээхэн шүүмжлэлтэй хандаж байгаа.

Хамгийн гол нь “Хүн мэддэг зүйлээрээ оролдох хэрэгтэй” гэсэн зөвлөгөөг түүнд хандаж хэлж буй. Х.Баттулга Зам тээврийн яамыг байгуулж өөрөө анхны сайдаар нь ажиллаж байсан. Үүнээс хойш тус яамыг өөрийнхаа компани мэт бодож зөвхөн тойрон хүрээлэгчдээ удирдлагын бүтэц рүү нь зүтгүүлсээр удаж байна. Энэ удаад ч мөн өөрийн хүн Л.Эрдэнэчимэгийг сайд болгохоор улайрсан нь үр дүнд хүрч байх шиг.

Х.Баттулгын хувьд өөрөө буусан ч тойрон хүрээлэгчдээ тус яамнаас салгаж болохгүй гэх хатуу бодолтой нэгэн. Өөрийнхөө л хүнийг тавьж байвал зам тээврийн салбарын талаар их, бага мэдлэгтэйн аль нь байх нь хамаагүй гэх Х.Баттулгын бодол дээр Л.Эрдэнэчимэг гишүүний амбицыг нэмээд энэ яам бүхэлдээ “бенз”, “шанага” хочтой эмэгтэйн эрх мэдэлд шилжихээр болж байна.

АН дахин бичигдээгүй бохир зарчмаа бариад, фракцийн эрх ашгаа улсын эрх ашгаас өндөрт тавьж сайдын суудлыг салбараа мэддэггүй, туршлагагүй, худалч хүмүүст өгч байна.  “Монос” эмийн сангийн сүлжээний эзэн АСЕАМ айсуй энэ чухал цаг үед автозам, төмөр зам, агаарын зам, усан замыг мэдээд салбарыг удирдаж чадах уу гэдэг ихээхэн эргэлзээтэй асуудал. Х.Баттулгын тус яамыг өмчлөх их шунал  юуг хэлээд байна вэ гэхээр Зам тээврийн салбарт өөрийнх нь сайд байх үеэс гаралтай “но” байна. Бүр дэндүү том “но” байна. Тиймээс л үгэнд сайн ордог уг салбарыг мэддэггүй байх тусмаа бүр сайн хүнийг зүтгүүлж буй. Булхайгаа нуун далдлах, хоёр хөршийн холбоотнууддаа амласнаа биелүүлэх, чадахгүй бол эвтэйхэн тайлбарлахын тулд заавал энэ салбарыг “атгаж” байх хэрэгтэй болсон байна.

Т.Хулан