АН-ын бүлэг өчигдөр хуралдаж, Засгийн газрын зарим сайд нарыг томилох асуудлыг хэлэлцсэн. Намын даргын зүгээс Сангийн сайдад Н.Батбаяр, Зам тээврийн сайдад Л.Эрдэнэчимэг, Хөдөлмөрийн сайдад Г.Баярсайхан нарын нэрийг дэвшүүлсэн ч тэднийг бүлгийн бусад гишүүд нь дэмжихгүй гэдгээ илэрхийлжээ. АН-ын бүлгийн гишүүдийн зүгээс элдэв асуудалд орооцолдоогүй, олны дунд нэр хүндээ бараагүй хамгийн гол нь салбараа мэддэг хүмүүсийг томилох хэрэгтэй гэдэг саналыг гаргажээ. Бүр сүүлдээ уг асуудлаас болж нилээн ширүүн маргаан болсон талаар эх сурвалж мэдээлж байна. Тус намын бүлэгт сайд болохыг хүсэгчид олон байгаа гэнэ. Тиймээс “Би ч  сайд болно. Тэрнийг болгож болохгүй" гэх хэрүүл их болжээ. Үүнээс гадна Ерөнхий сайд Ч.Сайханбилэг Л.Эрдэнэчимэг болон Н.Батбаяр нартай хамтарч ажиллаж чадахгүй гэдгээ бүлгийнхээ хурал дээр илэрхийлсэн байна.

Ингээд удаан маргалдсаны эцэст УИХ-ын дарга З.Энхболд Ерөнхий сайдад бүх эрх мэдлийг шилжүүлэхээр болжээ. Тэрбээр “Сайд нарын томилгооны асуудлаар бүлэг дотроо асуудлаа шийдэж чадахгүй байна. Тиймээс Ерөнхий сайд өөрийн эрх мэдлийн хүрээнд гурван сайдынхаа нэрийг оруулж ир. Оруулж ирсэн нэрсийг бүлэг дээрээ дэмжээд өгье” гэж хэлжээ.

Тиймээс Ерөнхий сайд Ч.Сайханбилэг эрх мэдлийнхээ хүрээнд сайд нарынхаа нэрийг оруулж ирж бүлгээр хэлэлцүүлэх юм байна.. Ингээд бүлгээр дэмжлэг авч чадвал УИХ-ын даргад өнөөдөртөө багатаж өргөн барих гэнэ. Үүний дараа даруй ээлжит бус чуулганыг зарлаж сайд нарын асуудлыг хэлэлцэнэ гэж Төрийн ордон дахь эх сурвалж мэдээллээ.

Т.Энхэлээ