Ерөнхий сайд Ч.Сайханбилэг зургаан сайдынхаа нэрсийг ирэх намрын чуулганаар өргөн барихаар болсон талаар бид өмнө нь мэдээлсэн. Энэ талаар Ерөнхий сайдын зөвлөх Ц.Мөнхтөр дөнгөж сая мэдээлэл хийлээ.

Тэрбээр " УИХ-ын ээлжит бус чуулганы хуралдаанаар МАН-ын 6 сайдыг чөлөөлснөөс хойш Ерөнхий сайд наймдугаар сарын 7-нд салбарын яамдад үүрэг гүйцэтгэгчийг томилох захирамж гаргасан. Ингээд 6 сайдыг Засгийн газрын гишүүд орлон ажиллаж байгаа. Дараагийн сайд нарыг томилох асуудлыг хэлэлцсэн. Гэвч  улс төрийн намуудтай харилцан ойлголцох, цаг үеийн нөхцөл байдлын улмаас уг асуудлыг намрын ээлжит чуулганыг хүртэл хойшлууллаа. Намрын ээлжит чуулган эхлэнгүүт Ерөнхий сайд  6 сайдын нэрээ өргөн барих нь зүйтэй гэж үзсэн.  Ээлжит бус чуулган хуралдах эсэх нь УИХ-ын мэдлийн асуудал. Өршөөлийн хуульд Ерөнхийлөгчийн тавьсан хоригийг авч хэлэлцэх асуудал байгаа. Хэрвээ ээлжит бус чуулган хуралдсан ч гэсэн 6 сайдын нэрийг өргөн барих асуудлаар хандах боломжгүй. Тийм учраас намрын чуулганаар энэ асуудлыг өргөн барих шийдвэр гаргаад байна. Ургац хураалт, өвөлжилтийн бэлтгэл, хадлан тэжээл гээд цаг үеийн олон  асуудал өрнөж байна. Дээрх асуудлаар яамдууд ажлаа сайн гүйцэтгэж байгаа.  Засгийн газрын хуралдаан тогтмол шийдвэрээ гаргаад явж байна. Ажил цалгардсан зүйл байхгүй. Ирэх 7 хоногийн сүүлчээр Ерөнхий сайд ургац, газар тариалангийн бүс нутгаар явж ажиллана. Мөн 9 дүгээр сарын 10-даар БНХАУ-ын даргатай уулзах уулзалт товлоод байгаа. Мөн сайд нарын асуудлыг ярихаасаа илүү  эдийн засгийг эрчимжүүлэх, цаг үеийн ажлаа шуурхайлах нь зүйтэй гэж үзсэн. Хичээлийн шинэ жил болохоос өмнө их, дээд сургуулийн сургалтын төлбөр, цэцэрлэгийн асуудлаар салбарын сайдад үүрэг өгсөн гэлээ.

Тэрбээр мэдээллийнхээ дараа сэтгүүлчдийн сонирхсон асуултад хариулсан юм.

-Намрын чуулган эхэлтэл сайд нарын асуудлаа өргөн барих боломжгүй юу?

- Тийм ээ, намуудын хоорондын улс төрийн ойлголцолд цаг хугацаа шаардлагатай байгаа юм. Сайдгүй яамдад үүрэг гүйцэтгэгч, дэд сайд, Төрийн нарийн бичгийн дарга нар нь байгаа.

Т.Хулан