2016 оны 4-р сарын 12-Улаанбаатар: Монгол Улс дах Нэгдсэн Үндэстний Байгууллагын төрөлжсөн байгууллагууд нь өвөлжилт, хаваржилт хүндэрсэн аймгуудын малчдад туслах багц тусламжийг Хүнс тэжээл, Хамгаалал, Хөдөө аж ахуй, Эрт үеийн нөхөн сэргээлт гэсэн 4 үндсэн чиглэлээр хэрэгжүүлж байна.

Уг тусламжийг НҮБ-ын Онцгой байдлын үеийн яаралтай тусламжийн сангийн 2.4 сая долларын санхүүжилтээр хэрэгжүүлж байгаа ба үүний 800 мянган ам доллар нь хөдөө аж ахуйн чиглэлд зориулагдах юм.

Монгол Улсын Хүнс, хөдөө аж ахуйн яам, НҮБ-ын Хүнс, хөдөө ахуй байгууллага (НҮБ-ын ХХААБ) хамтран хөдөө аж ахуйн тусламжийн хэсэг болох өвөлжилт, хаваржилт хүндэрсэн аймгуудын малчдад өвс тэжээл, ядарч доройтсон малын эрүүл мэндийг дэмжих сувилалын багцыг бэлтгэж, хүргүүлэхэд бэлэн болоод байна. Энэхүү тусламжийг малчдад илгээх цувааг хөдөлгөх ёслолын ажиллагаанд Хүнс, хөдөө аж ахуйн сайд хатагтай Р.Бурмаа, НҮБ-ын Суурин Зохицуулагч хатагтай Биата Транкман, НҮБ-ын Хүнс, хөдөө аж ахуйн байгууллагын Ази, Номхон далайн бүсийн орлогч захирал ноён Вили А.Фуавао, Онцгой Байдлын Ерөнхий Газрын дарга генерал Т.Бадрал нар оролцож байна.

Өвс тэжээл, ядарч доройтсон малын эрүүл мэндийг дэмжих сувилалын багцаас бүрдсэн энэхүү тусламжийг өвөлжилт, хаваржилт хүндэрсэн Увс, Завхан, Баянхонгор, Архангай, Дундговь, Сүхбаатар гэсэн зургаан аймгийн 45 сумын 100 ба түүнээс цөөн малтай 4300 гаруй өрхөд орон нутгийн засаг захиргааны нэгжээр дамжуулан хүргэх юм. Түүнчлэн малын асаргаа, сувилгааны бүтээгдэхүүнийг хайрцагт савлах, зөөх ажилд Хөдөө аж ахуйн дээд сургуулийн оюутнууд, Австрали, БНСУ-ын сайн дурын ажилчид сайн дураараа оролцож хүнд хэцүү цагт хөдөөгийн малчдад туслах сайн үйлсд өөрсдийн хувь нэмрээ орууллаа.

Үүнээс гадна ХХААЯ-ны хүсэлтээр НҮБ-ын ХХААБ нь нийт 500 мянган ам долларын дотоодын санхүүжилт бүхий Яаралтай Тусламжийн Техник хамтын ажиллагааны төслийг хэрэгжүүлж байна. Энэ төслийн хүрээнд 10 аймгийн 35 сумын (НҮБ-ын цогц тусламжийн төсөлд хамрагдаагүй) оны эхний тооллогоор хонин толгойд шилжүүлснээр 200 малтай байсан, байгаль цаг уурын хүндрэлийн улмаас мал сүргийнх нь 20 ба түүнээс дээш хувь нь хорогдсон, хүмүүнлэгийн аливаа тусламжид хамрагдаагүй 2000-гаад өрхөд малын өвс, тэжээл, хүнсний гурил тусламж болгон өгөхөөр бэлтгэл ажил хангагдаад байна. Үүний зэрэгцээ малын тэжээл, сувилалын багцыг 13 аймгийн улсын цөм сүргийн үржлийн 13 төвийн 54 суурьт мөн олгоно.

НҮБ-ын Хүнс, хөдөө аж ахуйн байгууллага нь өвөлжилт, хаваржилтын хүндрэлээс гадна үндэсний хэмжээнд анхаарал татсан асуудал болоод байгаа хонины цэцэг өвчний тархалттай тэмцэх зорилгоор Засгийн газрын хэрэгжүүлэгч агентлаг Мал эмнэлэг үржлийн газартай хамтран хонины цэцэг өвчний тохиолдолууд илэрсэн Улаанбаатар, Төв, Говьсүмбэр аймгийн дүүрэг, сумдад байгаа 400 орчим мянган толгой хонин сүргийг вакцинжуулахад санхүүгийн болон мэргэжил арга зүй, техникийн тусламж үзүүлэн ажиллах юм.