Монгол Улс ёс зүйн хувьд аялахад тохиромжтой дэлхийн шилдэг 10 орны /The World’s Ten Best Distinations/ нэгээр дахин шалгарсан тухай бид өчигдөр мэдээлсэн.
Тодруулбал, Калифорни мужийн Беркели хотноо байрладаг “Ethical Traveller” ТББ-аас хөгжиж байгаа орнуудыг байгаль орчин, зэрлэг ан амьдтыг хамгаалж байгаа байдал, нийгмийн халамж, хүний эрхийн талаар хэрэгжүүлж байгаа бодлого зэрэг шалгуураар дүгнэж, ёс зүйн хувьд аялахад хамгийн тохиромжтой 10 орныг жил бүр шалгаруулдаг болсон билээ.
Монгол Улс 2016 онд шилдэг 10 орны нэгээр анх шалгарсан бөгөөд 2017 онд ийнхүү хоёрдахь удаагаа шилдэг 10 орны тоонд орлоо. Энэ жил манай улсаас гадна Белиз, Кабо-Верде, Чили, Коста Рика, Доминика, Палау, Тонга, Уругвай, Вануату зэрэг орон шалгарсан байна.
Гэтэл өнгөрсөн онд International SOS болон Control Risks компанийн шинжээч, мэргэжилтнүүд судалгаа хийсний үндсэн дээр аялан явагч жуулчдад зориулан 2017 онд очиход аюултай улс орнуудын жагсаалт гаргахад Монгол улс дунд зэргийн аюултай орны тоонд орсон юм.
Мөн 2017 онд аялж очиход хамгийн их аюултай бүс нутгийг Мали улсын зүүн хойд Томбукту, Гао, Кидаль хотууд, мөн Суданы Дарфур хотууд гэсэн байна. Мөн Ливи, Төв Африкийн бүгд найрамдах улс, Өмнөд Судан, Сомали, Сири, Йемен, Афганисан зэрэг улсуудыг нэрлээд газрын зураг дээр хүрэн өнгөөр дүрсэлсэн байна.
Аюултай буюу улаан өнгөөр дүрсэлсэн улсуудад Чад, Ардчилсан Конго, Пакистан, Сахарын цөл зэргийг оруулсан байна.
Харин дунд зэргийн аюултай улс орнууд, бүс нутгаар Орос, Украин, Казахстан, Монгол, Энэтхэг, Саудын Араб болон Бразилийг нэрлээд газрын зураг дээр шараар тэмдэглэжээ.
Дээрх орнуудаас бага аюултай, доод түвшний эрсдэлтэй орнуудаар Франц, Испани, Итали, Польш, Белорусс, Турк, Канад, АНУ-г нэрлэж тунгалаг шараар тэмдэглэсэн гэнэ.
Гадаадын жуулчид, аялагчдад ямар ч аюулгүй орнуудад Норвеги, Швед, Финлянд, Исланд болон Данийг орууланшар ногооноор тэмдэглэсэн байна.
Шинжээчид жуулчид, аялагчдад учрах аюулаар террорист халдлага, дайн самуун, эмх замбараагүй байдал, нийгмийн тогтворгүй байдал, гэмт хэргийн түвшин, байгалийн гамшиг, хүчний байгууллагын үйл ажиллагаа, тээвэр дэд бүтэц зэргийг харгалзан үзсэн юм байна.
