Шинээр хэвлэх шаардлагатай бүх сурах бичгийг хэвлэн, 6 дугаар сарын 1-ний өдрөөс эхлэн нийслэл болон орон нутагт нийлүүлж эхлээд байгаа. Нийт сурах бичгийг 7 дугаар сарын 16-ны дотор нийлүүлж дуусгахаар зохион байгуулсан байна. 2012 онд нийт 89 нэр төрлийн 1,315,348 ширхэг сурах бичгийг хэвлэн нийлүүлж байна. Шинээр зохион хэвлэсэн 27 нэр төрлийн сурах бичгийн 90 хувь нь 2012 оны 7 дугаар сарын 1-ний дотор орон нутагт нийлүүлэгдсэн. Мөн өмнөх жилүүдэд зохиогдсон 62 нэр төрлийн сурах бичгийг нөхөн хангалтаар хэвлэн нийлүүлэх ажлын 70 хувийг гүйцэтгээд байгаа аж. Монгол улсын Засгийн газрын шийдвэрээр 2009 оноос эхлэн ерөнхий боловсролын сургуулийн бага ангийн сурагчдын 100 хувь, дунд ахлах ангийн сурагчдын 40 хувийн сурах бичгийг сургуулийн номын сангаар дамжуулан сурагчдад үнэ төлбөргүй хэрэглүүлэх ажлыг зохион байгуулж ирсэн.  Бага ангид хүүхэд бүрийн сурах бичгийг төрөөс  хариуцаж, дунд, ахлах ангийн бүтэн өнчин, хөгжлийн бэрхшээлтэй хүүхэд, амжиргааны баталгаажих түвшингээс доогуур орлоготой өрхийн болон ерөнхий боловсролын сургуульд 3 буюу түүнээс дээш хүүхэд нь суралцдаг өрхийн хүүхдийн сурах бичгийг үнэ төлбөргүйгээр хангадаг байна.Зах зээлд худалдах дунд ангийн сурах бичгийн дундаж үнэ 2200 төгрөг, ахлах ангийн сурах бичгийн дундаж үнэ 3420 төгрөг байна. Өнгөрсөн жилүүдэд хэвлэгдсэн сурах бичгүүд хуучин үнээрээ борлуулагдах юм байна.
                                                                                                                                                                                    Ц.Болор