Зуны үдэш хотын гудамжаар хөтлөлцөн алхах хосуудыг хараад битүүхэн атаархаж, хол байгаа хайртыгаа санагалзаж буй хүн олон байгаа биз ээ. Ойрын үед та хоёр нэг л таарамжгүй, утасны цаанаас байнга муудалцаж, болдогсон бол түүн дээрээ яваад очмоор санагдаж байна уу? Тэгвэл энэ асуудлыг тань бага ч болов нимгэлэх хэд хэдэн зөвлөгөөг хүргэхээр бэлтгэлээ.

    Хамгийн гол нь итгэлцэл. Хэрвээ хосуудын хооронд хайр болон итгэлцэл байгаа тохиолдолд тэдний хол, ойр байх нь нэг их асуудал биш юм. Хосууд хэн хэндээ хамааралтай байхдаа илүү сайн ойлголцож, дотно болдог. Харилцаа холбоо өргөн хөгжсөн өнөө үед гар утас, интернэт, мессэж гэх мэтийг өргөн ашиглах хэрэгтэй. Хайртдаа өдрийн болсон явдал, сонин сайхнаа хуучилж бай. Бас “мөрөөдлийн хүслээ” ч шивнэх хэрэгтэй. Ингэвэл хол байгаа хэдий ч та хоёр сэтгэл зүрхээрээ ойр байх болно. Чамайг нээлттэй байвал тэр ч мөн адил нээлттэй байх болно.
    Хосууд бие биенээ хүндэлж, бас үнэнч байх хэрэгтэй. Зарим хүмүүс хол байх тусам өдрөөс өдөрт улам хөндийрч, маргалдах нь ихэсдэг. Үүний гол шалтгаан нь хэн хэндээ хүлээцтэй хандаж, итгэж чадахгүйд л гол учир байдаг. Тиймээс нэг нэгнээ сонсож, халамжилдаг байх нь хамгийн чухал юм. Хайртыгаа дэмжиж, урамшуулсан халуун дулаан үгтэй хайрын мессэж илгээ, аль эсвэл дуртай дууг нь дуулж өг. “Хайртай” гэж цаасан дээр гараараа бичээд камерийнхаа өмнө өргөж харуул. Хэрвээ та хоёрын дунд хайр байгаа л бол түрхэн зуурын маргаан амархан шийдвэрлэгдэх болно.
    Хоёулаа хэрэгжүүлэх бяцхан дүрэм зохио. Та хоёрын дүрэм ямар ч байж болно. Жишээ нь маргалдах үедээ нэг нэгнийхээ тайлбарыг ээлж ээлжээр сонсоно, уурлахгүйгээр ярилцана, үдэшлэгт явахдаа хэлээд явна гэх мэт. Бяцхан дүрэм маргааныг шийдвэрлэхэд илүү хялбар болгох болно. Хоёулаа л хэрэглэх дундын “өмч”-тэй бол. Энэ юу ч байж болно. Хоёрхон гишүүнтэй фейсбүүк груп хамгийн сайхан санаа. Түүн дээр та хоёр юу ч “хийж” болно. Харилцаагаа сайжруулах энэ мэт олон аргууд байна. Чи хайрттайгаа хэрхэн ойлголцож, алсаас нэг нэгэндээ хайраа яаж мэдрүүлдэг тухайгаа найзууддаа зөвлөөрэй.