БНХАУ-ын Элчин сайдын яамны дэмжлэгтэйгээр Монгол Улсын Их сургууль “Монгол-Хятадын Найрамдал” хятад номын уншлагын танхимтай боллоо. Энэхүү танхимыг нээх ёслолын ажиллагаа өнөөдөр болов. Уг арга хэмжээнд МУИС-ын захирал доктор Я.Төмөрбаатар, МУИС-ын ШУС-ын захирал доктор Б.Буянтогтох, БНХАУ-ын Элчин сайд Шин Хаймин, ЭСЯ-ны Соёлын зөвлөх Ли Вэй, Соёлын газрын нарийн бичгийн дарга Хүчирхэг нарын албаны хүмүүс болон тус сургуулийн оюутнууд оролцлоо.
“Монгол-Хятадын Найрамдал” хятад номын уншлагын танхимыг 100 мянган юанийн хөрөнгөөр тохижуулж, ном тохимолыг худалдаж авсан байна. Тодруулбал энэхүү уншлагын танхим нь 700 гаруй сонин сэтгүүл, 500 гаруй хятад хэлний сурах бичиг, 300 гаруй ном зохиол судалгааны хэрэглэгдэхүүн, толь бичигтэй аж.
Уншлагын танхимын нээлтийн ёслолын ажиллагааны үеэр МУИС-ын захирал доктор Я.Төмөрбаатар “БНХАУ-ын Элчин сайдын яам МУИС-ын Хятад судлалын салбарыг хөгжүүлэх, гадаад харилцааг нь өргөжүүлэх, хятад хэлний багш нарын мэдлэг боловсролыг дээшлүүлэх, эрдэм шинжилгээ судалгааны ажлыг нь дэмжиж, ялангуяа хятад хэл сурах материаллаг баазыг бэхжүүлж, сургалтын хэрэглэгдэхүүн, ном сурах бичгээр хангах зэрэг олон талаар дэмжиж туслалцаа үзүүлж ирсэнд бид ямагт талархаж байдаг. Энэхүү танхим нь Хятад хэл, соёлыг сонирхон судлах хүн бүхэнд нээлттэй байх болно. Уншлагын танхимыг тохижуулахад гүн туслалцаа үзүүлсэн та бүхэнд гүн талархал илэрхийлж байна” гэсэн юм.
Харин БНХАУ-ын Элчин сайд Шин Хаймин “Монгол-Хятадын Найрамдал” хятад номын уншлагын танхимын нээлтийн үйл ажиллагаанд оролцож байгаадаа туйлын баяртай байна. Хятад Монголын соёлын салбарыг улам хөгжүүлэх нь маш чухал. Тиймээс бид энэ салбарт дэмжлэг үзүүлэхэд бэлэн байна” гэдгээ илэрхийлсэн.
МУИС-д хятад хэлний чиглэлээр 300 гаруй оюутан бакалаварын түвшинд Олон улс судлал, Хятад судлал-хятад хэлний орчуулагч, Хятад хэл шинжлэл, Монгол-Хятад судлал гэсэн мэргэжлээр суралцдаг байна. Мөн тус сургуульд Олон улс судлал, Гадаад хэлний боловсрол судлал, гадаад хэл шинжлэл зэрэг хөтөлбөрөөр магистар, докторууд суралцдаг аж. Энэхүү уншлагын танхим нь нээлттэй үйл ажиллагаатай учир хятад хэл, хятад соёлын талаар сонирхсон хүн бүрт нээлттэй гэдгийг МУИС-ын ШУС-ын Ази судлалын тэнхимийн эрхлэгч доктор дэд, продессор Х.Батмаа онцолж байлаа. Мөн тэрбээр “Уншлагын танхимын 500 гаруй сурах бичигт сургалтад хэрэглэгдэж байгаа монгол тайлбартай “Орчин цагийн хятад хэл” гэсэн 9 дэвтэр сурах бичиг багтсан. Энэхүү сурах бичгийн анх удаа олон хувиар худалдан авч, сургалтдаа хэрэглэх боломж бүрдэж байна” гэдгийг онцолж байсан юм.
Б.Батчимэг
