Гадаад улсад эмчилгээнд хамрагдсан иргэдийн сүүлийн 2 жилийн судалгаанаас үзэхэд нийт 198 иргэн гадаадад эмчилгээнд хамрагдан 11 тэрбум 398 сая 400 мянган төгрөг зарцуулжээ. Эдгээр иргэдийн 71,2 хувь нь  эрхтэн шилжүүлэн суулгах, зүрх судасны мэс засал, мэдрэлийн мэс засал хийлгэх эмчилгээнд хамрагдсан иргэд байгаа бөгөөд эмчилгээнд зориулж гарсан дээрх хөрөнгийн 68,9 хувийг тэд гаргасан байна. 

Тэгвэл гадаад улсад эмчлэгддэг байсан 39 төрлийн өвчнөөс доорхи долоон өвчнийг эх орондоо эмчилдэг болсон байна. Тодруулбал гүрээний ба нурууны артерийн нарийсал, бөглөрлийн үеийн мэс засал, дунд тархи багана бүтцийн байрлалтай мальформац, зүрхний хэм алдалтын үеийн эмчилгээ болох абляци, улаан хоолой, цагаан мөгөөрсөн хоолойн фистул, ходоод гэдэсний хавдрын үеийн хими эмчилгээ,  түлэгдлийн улмаас үүссэн талбай ихтэй соривын эмчилгээ, өндгөвчний төрөлхийн дутуу хөгжил болон эрэгтэйчүүдийн үрийн сувгийн эмгэгээс үүдсэн үргүйдлийн эмчилгээнүүдийг гадаад явж эмчлүүлэх шаардлагагүй болжээ.

Өнгөрсөн оны 7 дугаар сараас хойш зүрхний хэм алдалтын үеийн эмчилгээ болох абляци эмчилгээг давхардсан тоогоор 100 гаруй, тархины судсан дотуурх мэс заслын эмчилгээг 414 иргэн эх орондоо хийлгэсэн байна. Зүрхний хэм алдалтын эмчилгээг Зүүн өмнөд Азийн орнуудад 8000-20000 ам доллар, тархины судсан дотуурх мэс заслын эмчилгээг доод тал нь 50000 ам. доллар төлж эмчилдэг байдаг.  Харин эдгээр эмчилгээг эх орондоо хийдэг болсноор зүрхний хэм алдалтын үеийн абляци эмчилгээний зардлаас 10-13 сая төгрөгийг эрүүл мэндийн даатгалаар хөнгөлөгдөн иргэн 5-6 сая төгрөг,  өндөр өртөгтэй мэс засал болох тархины судсан дотуурх мэс заслын эмчилгээний зардлаас 8-70 сая хүртэлх төгрөгийг эрүүл мэндийн даатгалаар хөнгөлүүлж 10-3 сая төгрөг төлж эх орондоо эмчилгээнд хамрагдах бүрэн боломж бүрдсэн байна.

Дашрамд сонирхуулхад зайлшгүй шаардлагаар гадаадад эмчлүүлсэн нийт иргэдийн 41.3 хувь нь БНСУ-д , 26,6 хувь нь БНЭУ-д, 19 хувь нь БНХАУ-д тус тус эмчилгээ хийлгэжээ.