Эдийн засгийн байнгын хороо 57.9 хувийн ирцтэй хуралдаж Зам тээвэр хөгжлийн сайд Ж.Бат-Эрдэнийг үүрэгт ажлаас нь бүрэн чөлөөлөх асуудлыг хэлэлцлээ.
Хуралдааны үеэр Д.Эрдэнэбат “Ажлын байран дээр аллага хийнэ гэдэг бол төрийн албаны нэр хүндийг шууд доош нь хийсэн үйлдэл. Үүнтэй холбоотойгоор сайд өөрийн чөлөөлөгдөх өргөдлөө өгсөн байна. Чөлөөлөгдөх процесс нь хууль зөрчиж явагдсан гэж харж байгаа. Энэ асуудлаар ес дүгээр сарын 3-ны өдөр Засгийн газрын хэрэг эрхлэх газраас мэдээлэл авсан, надад хариу өгсөн. Гэтэл одоо оруулж ирсэн өргөдөл нь өөр өргөдөл оруулж ирсэн. Тэгэхээр Ж.Бат-Эрдэнэ хоёр өргөдөл өгсөн юм шиг байгаа. Одоо энэ танилцуулгад ирсэн өргөдөл нэг өөр өргөдөл, надад танилцуулгаар гаргаж өгсөн өргөдөл нь бас нэг өөр өргөдөл. Ийм хоёр өргөдөл гаргаж өгдгийн учир нь юундаа байгаа юм бэ. Сайд огцрох хүсэлтээ нэг л өргөдлөөр илэрхийлдэг. Би үүний учрыг нь олох гээд, аль нь үнэнийг нягтлах гээд тухайн үед Ж.Бат-Эрдэнэ сайдын цахим хуудсан дээрээ тавьж байсан өргөдлийг хайгаад олсонгүй. Бүгд устгагдсан байх юм. Энэ засгийн газар яагаад ийм хариуцлагагүй юм хийж байгаа юм бэ. Ямар учраас өргөдөлд өөрчлөлт оролдлого хийсэн гэдгээ тайлбарламаар байна. Би Засгийн газрын хууль эрх зүйн ажиллагааг юу гэж тайлбарлаж байгаа юм бэ. Засгийн газрын хуулиар хэрвээ Засгийн газрын гишүүний ор гарсан бол Засгийн газар 30 хоногийн дотор түүний орын хүнийг нөхөн томилох заалттай. Энэ заалт зөрчигдсөн. Найм дугаар сарын 12-ны өдөр гарсан Засгийн газрын шийдвэр хэрвээ хүчин төгөлдөр байсан бол есдүгээр сарын 12-ны дотор энэ асуудлыг их хуралд оруулж багтаж шийдвэрлэх асуудал одоог болтол сунжирсаар байгаа. Орны хүнийг нөхөн томилох хүртэл Ерөнхий сайд түр орлон гүйцэтгэгчийг томилдог. Түр орлон гүйцэтгэгчээр Энхтүвшин сайд тавьсан гэж байгаа. Эхтүвшин сайдыг тавьснаар ор нь гарсан тохиолдолд тооцогдож байгаа. Тэгэхээр ор нь гарсан бол 30 хоногийн дотор асуудал нь шийдэгдэх ёстой учир хууль зөрчсөн гэж харж байгаа.
Засгийн газрын хэрэг эрхлэх газрын дарга Г.Занданшатар “Хуулийг зөрчсөн эсэхийг тогтоодог дээд байгууллага нь Үндсэн хуулийн цэц. Таны ярьж байгаа зүйлийн агуулгаар үндсэн хуулийн цэцэд гомдол гаргасан юм байна лээ. Үндсэн хуулийн цэцээс хууль зөрчөөгүй гэж үзсэн. Монгол улсын Үндсэн хуулийн 39 дүгээр зүйлийн хоёр дахь хэсэгт Монгол улсын Ерөнхий сайд, Засгийн газрын бүтэц бүрэлдэхүүн, түүнд өөрчлөлт оруулах талаараа Ерөнхийлөгтэй зөвшилцөн УИХ-д өргөн мэдүүлнэ, Ерөнхий сайд уг асуудлаар Ерөнхийлөгчтэй 7 хоногийн дотор зөвшилцөж чадаагүй тохиолдолд УИХ-д өөрөө өргөн мэдүүлнэ гэж заасан байдаг. Харин Засгийн газар уг хуулийн 23дугаар зүйлийн 1-т Ерөнхий сайд Ерөнхийлөгчтэй зөвшилцөл үүссэний дээр Засгийн газрын бүтэц бүрэлдэхүүнд өөрчлөлт оруулах, Засгийн газрын гишүүнийг томилох тухай тушаалаа УИХ-Д өргөн мэдүүлэхийг заасан. Засгийн газрын гишүүн Зам тээвэр хөгжлийн сайдыг албан тушаалаас чөлөөлөх асуудал нь Засгийн газрын бүтэц бүрэлдэхүүнд өөрчлөлт оруулж байгаа асуудал биш” гэв.
Үүний дараа санал хураалт явуулж Эдийн засгийн байнгын хорооны хуралдаанаар Ж.Бат-Эрдэнийг Зам тээвэр хөгжлийн сайдын үүрэгт ажлаас чөлөөлөхийг 100 хувь дэмжлээ.
Р.Хишигжаргал
