Өчигдөр Сангийн дэд сайд Ч.Ганхуяг гудамжнаас сүрхий сурвалжлага хийж, түүнийгээ баталгаажуулан зурагжуулж фэйсбүүк, твиттерийнхээ хуудсанд тавьсан нь ихээхэн маргаан өрнүүллээ. Өчигдөр Сангийн дэд сайд Ч.Ганхуяг гудамжнаас сүрхий сурвалжлага хийж, түүнийгээ баталгаажуулан зурагжуулж фэйсбүүк, твиттерийнхээ хуудсанд тавьсан нь ихээхэн маргаан өрнүүллээ.
    Өчигдөр Сангийн дэд сайд Ч.Ганхуяг гудамжнаас сүрхий сурвалжлага хийж, түүнийгээ баталгаажуулан зурагжуулж фэйсбүүк, твиттерийнхээ хуудсанд тавьсан нь ихээхэн маргаан өрнүүллээ. Учир нь түүний урьд явсан “Land cruiser” УНК 6988 гэсэн улсын дугаартай тэрэгний жолооч хоёр цонхоороо хог гаргаж хаяад байсныг гярхай сайд маань анзаарч, зурагжуулан интернэтэд байршуулжээ. Тэгэхдээ “Анхаар! Нэг цонхоороо цаасаа, нөгөөхөөрөө зайрмагны модийг хаядаг эмэгтэй жолоочтой тэрэг” хэмээн бичиж үлдээжээ. Түүний энэхүү зурвас сурвалжлагын дор олон нийт сэтгэгдлээ бичиж байр сууриа илэрхийлцгээлээ. Ихэнхи нь хотын соёлыг мэддэггүй, олон нийтийн эрх ашгийг зөрчиж байгаа талаар санал бодлоо бичжээ.
Интернэтэд олон нийт “Хүмүүсийн ийм үйлдлийг нилээд удаан хугацаанд хатуу хяналт, өндөр торгууль, шийтгэлээр дэглэж байна ийм муу зуршил арилна”, “Хогоо гудамжинд хаяж, бусдын эрх ашгийг зөрчиж байгаа хүмүүсийн зургийг нийтэлж ичээж байя”, “Түгжрэл дунд зогсож байсан бол хогийг нь буцаагаад машинд нь хийх байсан юм”, “Хүн бүр бурууд нүд хурц байх ёстой”, “Болъё оо гэдэг цонх үүсгээд энэ мэт хүмүүсийг оруулж байя”, “Машин гэлтгүй гэрийнхээ цонхоор хог хаядаг хүмүүс бий”, “Хэлээд ойлгохгүй хүмүүсийг ингэхээс өөр яахав дээ, энийгээ хараад ичих хэрэгтэй”, “Иймэрхүү сайхан машин унасан хүмүүс л хотыг хот биш болгож байгаан”, “Энэ эмэгтэй ичээч ээ, эмэгтэй хүний нэр хүндийг унагаад хаячихлаа”, “Нээх гоё машин уначихаад ийм бүдүүлэг байх ч гэж дээ”, “Сүүлийн үед бүдүүлэгдүү эмэгтэй жолооч нар олшроод байгаа шүү” гэх мэт бухимдсан бас санаа зовсон хүмүүс сэтгэгдлээ Ч.Ганхуяг сайдтай хуваалцжээ.
    Гэхдээ интернэт ертөнцийнхэн дандаа дэд сайдын энэ бичил сурвалжлагыг дэмжээд байсангүй. Зарим нэг нь ч дэд сайдыг жаахан эвгүй үгээр хэлсэн байна лээ. Бодвол дээрх машины жолооч эмэгтэйн хамаатнууд, найзууд ч байж мэднэ. Үүний зэрэгцээ “Мундаг банкир гэж боддог гэтэл ажлаа өгөх дөхөөд, гудамжны жолоочийг юу хийж явааг хянадаг болж. СӨХ-ийн дарга болговол зүгээр ч юм уу” гэж Ч.Ганхуягаар даажигнахаа ч мартаагүй байна лээ. Мөн Ч.Ганхуягийг арай ч ийм жижиг юм хөөцөлдөж явмааргүй юм гэсэн сэтгэгдэл ч тааралдав.
    Мөн энэхүү машин хэн гэгчийн нэр дээр байдаг, жолооч нь хэн болохыг, зургийг нь олон нийтэд ил болгох ёстой гэсэн саналууд ч хөврөөстэй. Зарим нэгэн Ганболд гэгч этгээдийн машин уу даа ч гэж таамагласан юм. Уг нь их хотын соёлыг зөрчсөн энэ тэрэгний жолоочийг олох амархан л даа. Замын цагдаа руу утас цохиод л шүүлгэхэд дурайтал гараад ирнэ. Юутай ч гэсэн хотын соёлыг харуулсан дэд сайдын бичил сурвалжлага нэг өдөр интернетийн ертөнцийнхөний амны зугаа, наргиа болов. Бас Ч.Ганхуягийн энэ аргыг ихээхэн үр дүнтэй шийдэл гэж үзэгсэд ч бага багаар нэмэгдэж байна.
Ийнхүү Сангийн дэд сайд Ч.Ганхуяг хоёр цонхоороо ээлжлэн хог хаядаг бүдүүлэг жолоочтой тэргийг олон түмний анхааралд өртүүлэв. Интернэт ертөнцийнхөн энэ тэргийг хараад андахааргүй танихаар болов. Харин энэхүү ганган тэрэгний хотын замыг хогийн сав гэж боддог жолоочийг нь хэн гэдэг бол оо? Бас юу хийдэг болоо?