МАХН-ын дарга Н.Энхбаяр шоронд хоригдсоноосоо хойш бие нь ихэд муудаж 30 орчим минут ухаангүй болсон, дахин ингэж ухаан алдвал сэргэхүй гэсэн мэдээлэл олон нийтийг түгшээж байна. Зарим эх сурвалжийн мэдээлж байгаагаар бол Ерөнхийлөгч асан Н.Энхбаярын баруун хөл нь мэдээгүй, гуурсаар амьсгалж байгаа аж. Хүний их эмч, анагаах ухааны доктор Л.Жамбалжав энэ талаар ихээхэн бухимдаж ярьсан сурагтай. Тэрээр Ц.Элбэгдорж ерөнхийлөгчийг осолд ороод ирэхэд нь биеийг нь дээрдүүлээд БНСУ-руу явуулж байсан. Тиймээс Ерөнхийлөгч Ц.Элбэгдоржийг хүнлэг байхыг хүссэн бололтой. Ийнхүү Н.Энхбаярын намаас өнгөрсөн УИХ-ын сонгуульд Хан-Уул дүүрэгт нэр дэвшиж багагүй санал авсан Л.Жамбалжав эмч экс ерөнхийлөгчийн эрүүл мэндэд ихээхэн анхаардаг хэвээр байна. Тиймээс олон нийт түүнийг Н.Энхбаярын эмч хэмээн нэрлэх болсон юм.
Өмнө Н.Энхбаярыг өлсгөлөн зарласны дараах биеийн байдлын талаар “Үүнээс цааш удвал энэ хүн сэхэл авахгүйд хүрчих гээд байна гэсэн эмч нарын дүгнэлт гарч, хамгийн эцсийн шатанд хүрсэн хойно л батлан даалтад гаргасан ш дээ. Үүнээс үүдэн тэр хүн амьдаараа борцлогдсон. Маш олон хоног өлсгөлөн зарлачихсан. Биеийнх нь ихэнх эд эс үхлийн байдалд шилжчихсэн. Зүрх нь тэжээлийн дутагдалд орж зогсоход бэлэн болчихсон. Хүний биеийг тэнцвэртэй, сэтгэл санааг тогтуун байлгадаг бүхий л эрдэс тэжээлүүд нь эрс дутагдчихсан” хэмээх дуулиант ярилцлага өгч байсан юм. Энэ ярианаас үүдэн олон нийт Н.Энхбаярыг амьдаараа борцлогдсон гэж ам дамжин шуугих болсон юм.
Ийнхүү Н.Энхбаярын эмч гэгдэх болсон Л.Жамбалжав энэ удаа Ерөнхийлөгч Ц.Элбэгдорж руу салхи үлээлгэж эхэллээ. Түүний үг, байр суурь олон нийтэд урьдынх шигээ үнэ цэнтэй байх эсэхийг ирэх өдрүүд харуулах биз. Мөн Л.Жамбалжав эмчийг Н.Энхбаярт үнэнч байсныхаа төлөө Эрүүл мэндийн дэд сайд эсвэл энэ салбарын нэг агентлагийн дарга болох гэж байгаа гэсэн яриа саарал ордноор тараад удаж байна.
Харин Ерөнхийлөгч асан Н.Энхбаярын бие муудсаны дараа түүний гэргий О.Цолмон Монгол Улсын Дээд шүүхийн ерөнхий шүүгч Ц.Зоригт, Улсын Ерөнхий прокурор Д.Дорлигжав хоёр хандан захидал бичсэн. Ц.Зоригтод хандсан захидалдаа “Миний нөхрийн бие махбодид ноцтой хүндрэл өөрчлөлт гарч бие нь улам муудаж байгаа бөгөөд энэ нь өлсгөлөнгийн үр дагавар уу, эсвэл баривчилгааны үед болон түүний дараах хоригдох хугацаанд гадны нөлөөнөөс үүссэн хорт үр дагавар уу гэдгийг одоохондоо ялгаж тогтоогоогүй бөгөөд үүнийг тогтоох боломжийг шүүгч олгоогүй билээ. Бие нь тэнхэрч, өчүүхэн ч гэсэн тамир тэнхээ авах боломжийг ч Соёмбо-Эрдэнэ олгоогүй билээ. Хөдөө орон нутагт, цэвэр агаарт тэнхээ тамир суух боломжийг хотын гортиг орхиж болохгүй шийдвэрээрээ, нөхөн сэргээх хугацааг хааж яаравчлан шүүх хурал зарласнаараа шүүгч нь хүний эрүүл мэнд, амь насанд тоомжиргүй ханддагаа харуулсан бөгөөд энэ нь манай бүх шүүгчдийн төрх гэж бодохгүй байна. Миний нөхрийн улс орон, ард түмнийхээ төлөө хийсэн бүтээснийг яаж ч баллах гээд боломжгүй ил тод бөгөөд миний нөхрийн хувь заяа ард түмний хувь заяатай салшгүй холбоотой болсныг ойлгож байгаа биз дээ” хэмээн бичсэн юм.
Харин МУ-ын Ерөнхий прокурор Д.Дорлигжавт “Прокурорын байгууллагаас энэ бүхэнд ямар ч хууль зөрчсөн үйлдэл байхгүй гэж дүгнэж байгаагаас харахад таны хариуцаж байгаа байгууллага энэ бүхнийг өөгшүүлж дэмжиж байгаа нь илэрхий байна. Олон улсын хүний эрхийн байгууллагууд хүртэл энэ талаар байр сууриа илэрхийлсээр байтал прокурорын байгууллага өөрийн байр сууриа хамгаалсаар байгаа байдал нь таны үед Монголын прокурорын байгууллага хүний эрхэм дээд үнэт зүйл болох хүний эрх, эрх чөлөө, эрүүл мэндийг хүндэтгэх бус харин өөр байр сууринаас хандаж байгааг нотолж байна.
Н.Энхбаярын бие махбодь сэргэж хэвийн байдалд орох цаг хугацаа өгөлгүй хорьсноор бие нь улам муудаж амь насанд нь аюул учирч байгаа бөгөөд энэ бүхний үндсэн дээр гэр бүл, намын нөхөд, дэмжиж буй хүмүүс улс төрийн зохион байгуулалттай аллага явагдаж байна гэж дүгнэж байгаа бөгөөд таны хариуцаж байгаа байгууллага үүнд оролцож байна гэж бодох үндэслэл бүү гараасай гэж бодож байна” хэмээн бичсэн юм.
Ийнхүү Н.Энхбаярын биеийн эрүүл мэндийг тойрсон маргаан өргөжиж, хүрээгээ тэлж эхэллээ.
24tsag.mn
