Их аварга Д.Дагвадоржийн ааг омог хэрээс хэтэрч, бусдыг зодож танхайрсан үйлдэл нь ганцаар тогтохоо байлаа. Тэрбээр Өвөрхангай аймгийн Есөнзүйл сумын 80 жилийн ойн баярын үеэр дахиад л хүн зоджээ. Өндөр гэгээн Занабазарын төрсөн нутгийн ойд зочлохдоо Их аварга Д.Дагвадорж ах Д.Сумъяабазарыгаа УИХ-ын сонгуульд дэмжсэнгүй хэмээн олны танил сэтгүүлчийг нүүр, нүдгүй зодсон байна. Хэдий олон түмний хайрлаж, хүндэтгэдэг Их аварга ч гэлээ түүний энэхүү үйлдэл нь хэрээс хэтэрч, сэтгүүлчийн биед нэлээд гэмтэл учирсан байна. Тиймээс зодуулсан сэтгүүлч цагдаагийн байгууллагад ханджээ. Бөхөө дээдэлдэг монгол түмний бахархлыг дааж чадахгүй, аархаж, сагсуурч яваа түүний өмнөх хэргүүд олны нүдэнд ил бас далд маш олон байдаг байна.