“Шударга ёсны хувьсгалт” үндэсний нэгдсэн оюутны холбооны залуучууд өнөөдөр хэвлэлийн бага хурал хийлээ. Хуралд “Шударга ёсны хувьсгалт” үндэсний нэгдсэн оюутны холбооны ерөнхийлөгч Д.Мөнхтөр, тус холбооны ерөнхий нарийн бичгийн дарга Э.Азхүү, Ц.Ойдов, Ц.Энхтуяа “Монгол туургатан хуралдай” ТББ-ын гишүүн доктор Д.Мөнхсайхан нар оролцов. Ерөнхий нарийн бичгийн дарга Э.Азхүү “Манай холбоо нь “Ард түмний ерөнхийлөгчөө авръя” нэртэй хөдөлгөөнийг санаачлан идэвхтэй ажиллахаар боллоо. Манай оюутны холбоо нь анх үүсэн байгуулагдсанаас хойш олон оюутны холбоо болон төрийн бус байгуулгуудтай хамтарч үндэсний эрх ашгаа хамгаалахаар ажиллаж байна. Манай хөдөлгөөнд “Орхон аймгийн оюутны холбоо”, “Эх орончдын индэр”, “Бид хөгжлийн төлөө хамтдаа”, “Ёс зүйг дээдлэгч залуучууд”, “Буган Хумбага” , “Хөгжлийн өндөрлөг” , “Монгол туургатны хуралдай” ТББ, “Оюутан залуучуудын соёлын солилцооны холбоо”, Оюутны эрх ашгийг хамгаалах нийгэмлэг”-ийнхэн нэгдсэн байгаа. Оюутан, залуучууд маань энэ хөдөлгөөнд нэгдээрэй” гэлээ.
“Монгол туургатны хуралдай” ТББ-ын гишүүн доктор С. Мөнхсайхан “Бид яагаад Н.Энхбаяр даргыг хамгаалж, өмгөөлж байна вэ гэж та бүхэн гайхаж байгаа байх. Хэдхэн хоногийн өмнө Станфордын их сургуулийн гурван эрдэмтэн Монголд ирж лекц уншсаныг та бүхэн санаж байгаа болов уу. Манай Монголын дотоодын бүх нөөц, эрдэс баялгийг нөөцлөн гадаадад байршуулан удирдах зөвлөл гэж томилдог гэнэ. Удирдах зөвлөлийн гишүүдийн 30-аас доошгүй хүн нь ОУБ-дыг хүрээлж байдаг. Ингэж явсаар Монгол улс биш болно. Ингэж л харийнхан биднийг устгах нөхцлийг төлөвлөөд сууж байна. Монгол Улсын аюулгүй байдал үнэхээр алдагджээ. Монгол Улсын тусгаар тогтнол, аюулгүй байдлын төлөө Н.Энхбаяр өөрийн амь, биеийг үл хайрлан тэмцэж байгаа учраас бид оройтоогүй дээрээ МАХН-ын дарга Н.Энхбаярыг аврах ёстой” гэсэн юм.
Тус холбооны ерөнхийлөгч Д.Мөнхтөр “Манай улс ардчилсан нийгэмд шилжиж орсноос хойш 20 гаруй жилийг үдээд байгаа боловч дэлхий дахинд улс төрийн зорилгоор хүнийг хилс хэрэгт гүтгэн хэлмэгдүүлсэн ноцтой алдааг одоо гаргаад байна. Гадныхны гар хөл болсон эх орноосоо урвагчид албан тушаал, эрх мэдлийн төлөө үүнийг хийсэн гэж бид үзэж байна. Тиймээс эх орныхоо тусгаар тогтнол, шударга ёсны төлөө бид энэ хөдөлгөөнийг өрнүүлж залуусыг нэгдэхийг уриалж байна. Манай холбоонд нэгдсэн ТББ, нийгэмлэгүүд 2-5 жил үйл ажиллагаа явуулж байгаа харьцангуй туршлагатай залуус бий. Одоогоор манай холбоо 1000 гаруй гишүүнтэй болоод байна. Залуу хүний хийж болох бүхий л зөв үйлээр бид цаашдаа үйл ажиллагаагаа өргөжүүлэх болно. Бидэнтэй нэгдэж байгаа залуусын гарын үсгийг цуглуулана. Бид юунаас ч эмээлгүй хүний эрхийн төлөө өөрсдийн үзэл бодлыг хамгаалж, хэрэгжүүлнэ. Зорьж буй ажлынхаа талаар олон сонин компанит ажил хийхээр ажилдаа ороод байна” гэлээ.
