Ерөнхий сайд Н.Алтанхуяг шинэ Засгийн газрын сайд нар илүү цагаар ажиллана хэмээн амласан. Энэ нь нэг талаас сайд, дарга нар улсын ажилд их цаг зарцуулж, ажлаа сайн хийх мэт харагдавч нөгөө талаас зарим иргэдийн эрхийг хөндөж байгаа юм. Учир нь Засгийн газрын хурлыг амралтын өдөр, бямба гарагт хийвэл сайд нарыг дагаад салбарын мэргэжилтнүүд хуралд суух шаардлагатай болдог. Тухайлбал Эдийн засгийн яамны сайд бямба гарагийн хуралд ажлаа танилцууллаа гэхэд түүнтэй хамт яамны мэргэжилтнүүд амралтын өдрөө ажиллах хэрэгтэй болно. Тиймээс яамны ажилчид хүссэн, хүсээгүй ч бусад төрийн албан хаагчдаас илүү цагаар ажиллах болж байна.
   Н.Алтанхуягийн амлаж байгаа амралт авахгүй байх, илүү цагаар ажиллах зэрэг шаардлагыг шинэ сайд нар зөвшөөрсөн. Гэхдээ тэдний ард ажиллаж байгаа алба хаагчид дагаад хөлд чирэгдэх болж байгаа нь зарим хүний дургүйцлийг төрүүлж байна. Засгийн ажлыг ингэж их хугацаа зарцуулах биш харин тогтсон хугацаандаа үр бүтээлтэй ажиллах нь зөв гэх хүн олон байгаа юм.