Энэ парламент эхнээсээ л элдэвийн сонинтой байна. Эхлээд чуулганаа зарлах гэж баахан ярилцсан. Тэгээд хүчээр анхныхаа чуулганыг нээгээд хаачихав. Үр дүнд нь хууль бус гэх УИХ-ын даргатай болсон. Мөн парламентад 25 суудалтай МАН одоо болтол албан ёсны бүлэггүй байж байгаад чуулганыг хаалгуулав.
     МАН-ынхан хууль бус даргаа эргэж ярь гэсээр чуулганыг өнгөрүүлэв. Харин хууль бус дарга гэх З.Энхболд нь МАН-ынханыг хууль санаачилаад ирвэл хэзээ ч бүлгийг нь байгуулахад бэлэн гэж мэдэгдсэн юм. Ийнхүү хоёр том намын зөрчил гуравдахь хүчнийхэнд таалагдахгүй байгаа бололтой. Тиймээс ИЗНН-аас сонгогдсон С.Дэмбэрэл өчигдөр МАН-ын бүлэгийг байгуулахын тулд хуульд нэмэлт өөрчлөлт оруулах хуулийн төсөл өргөн барилаа. Тэрээр үүнийгээ “Монгол төрийн гацааг гаргаж парламент бүрэн бүрэлдэхүүнээрээ ажиллах боломжийг бий болгохын тулд анхны хуулиа өргөн барилаа” гэж тайлбарласан. Харин олон нийт түүнийг “анхны хуулийн санаачилгаараа МАН-д тал засаад зусардаж байна. МАН-ынхан өөрсдөө тоохгүй байхад өмнөөс нь бүлэг байгуулж өгөх гэж гүйх нь шившиг” гэж тайлбарлав. Ийнхүү ИЗНН-ынхан хоёр том намын эв зүйг олох гэж хичээж, МАН-ын бүлэгийг байгуулж өгөхийн тулд эхэлж санаачилга гаргалаа.