Н.Алтанхуягийн тэргүүлсэн “шинэтгэлийн” гэх тодотголтой шинэ Засгийн газар олон янзын өнгө төрхтэйгээр бүрдлээ. Хамтарсан гэдэг утгаараа олон намын төлөөлөл орсон. Гэхдээ үүнээс илүүтэйгээр ямар хүмүүс Засгийн газрын сайд болов гэдэг хүмүүсийн сонирхлыг татаж байна. Шинэ Засгийн газрын гишүүдийг “шинэ” өнцөгөөс шинжье.


  Энэ Засгийн газрын хамгийн их онцгойрч буй нь Монголдоо “топ” гэгддэг олон баячуудыг багтаасан явдал юм. Бизнесийн хүрээнд аль хэдийн танигдсан, компанийхаа нэрээр овоглосон цөөнгүй эрчүүд байна. Үйлдвэр хөдөө аж ахуйн сайд “Женко” Х.Баттулга, Батлан хамгаалахын сайд “Ажнай”-н Д.Бат-Эрдэнэ, Эдийн засгийн хөгжлийн сайд “Фортуна” Н.Батбаяр, Гадаад харилцааны сайд “Бодь”-ийн Л.Болд, шадар сайд “ТБД”-ийн Д.Тэрбишдагва гэх зэрэг салбар салбартаа архагшсан эрхмүүд ирэх дөрвөн жил сайдын ажил хийнэ. Тэднээс гадна Уул уурхайн сайд Д.Ганхуяг “Бриж” группын эзэн бол ЗГХЭГ-ийн сайд Ч.Сайханбилэг, Зам тээврийн сайд А.Гансүх нар ч мөн амжилттай яваа хувийн бизнестэй. Мөн “Шударга ёс” эвслээс сонгогдсон Эрчим хүчний сайд М.Сономпил “Залуу монгол” корпорацийн эзэн бөгөөд “Чингис” сүлжээ ресторан болон шар айрагны бизнестэй нэгэн. АН-ын дарга, ерөнхий сайд Н.Алтанхуяг ч тэднээс юугаараа дутах вэ гээд мах, чацарганы арилжаа эрхэлдэг. Харин энэ олон бизнесийн сэтгэлгээ нь хөгжсөн сайд нарын дундаас хувийн аж ахуй эрхэлдэггүй нь Н.Удвал, Ч.Улаан, Х.Тэмүүжийн нар юм.

  Нутаг усаар нь шинжвэл энэ удаа Архангай аймгаас хамгийн олон буюу таван сайд сонгогджээ. Эрүүл мэндийн сайд Н.Удвал, Эдийн засгийн сайд Н.Батбаяр, Уул уурхайн сайд Д.Ганхуяг, шадар сайд Д.Тэрбишдагва нар бүгд нэг аймгаас гаралтай юм. Харин Батлан хамгаалахын сайд Д.Бат-Эрдэнэ, Барилга хот байгуулалтын сайд Ц.Баярсайхан нар Өмнөговь аймгаас гаралтай. Мөн Л.Болд, Х.Баттулга нар бол Баянхонгор аймгийн хөвгүүд юм. Ерөнхий сайд Н.Алтанхуяг, М.Сономпил нар ч Увсын нутгийн ах дүүс.

    Засгийн газарт энэ жил хамгийн олон буюу гурван эмэгтэй гишүүн орсон тул  ерөнхий сайд Н.Алтанхуягийг “жендерийн мэдрэмжтэй” хэмээн өргөмжлөөд буй. Гэхдээ энэ шинэ зүйл биш бөгөөд өмнө нь Монголын Засгийн газар гурван эмэгтэй сайд ажиллаж байсан түүх бий. Соёл, спорт, аялал жуулчлалын сайд Ц.Оюунгэрэл, Байгаль орчин Ногоон Хөгжлийн сайд С.Оюун нарын хувьд олон жил номын мөр хөөж хувийн амьдралаа хойш нь тавьсан эмэгтэйчүүд. Тиймээс ч гэр бүлийн асуудал дээр хэл аманд өртөх нь элбэг байдаг. Харин  Эрүүл мэндийн сайд Н.Удвалыг “муу эр хүнээс илүү үнэнч хүн” гэж үнэлэх хүн цөөнгүй байдаг.

  Энэ засгийн газрын хамгийн залуу төлөөлөл нь Хууль зүйн сайд Х.Тэмүүжин. МУИС-ийн хууль зүйн багшаас УИХ-д орсон тэрбээр 1971 онд төрсөн, 41 настай. Харин Сангийн сайд Ч.Улаан 1954 онд төрсөн хамгийн ахмад сайд болж байна. Сонирхолтой нь Д.Ганхуяг, Х.Баттулга, С.Эрдэнэ, Д.Бат-Эрдэнэ нар бүгд 1963 онд төрсөн нэг үе тэнгийнхэн юм.

   Гадаад хэргийн сайд Л.Болд бусдаасаа хамгийн олон буюу  дөрвөн орны хэл мэддэг гэдгээрээ тодорч байна. Тэрбээр Германд сургууль төгссөн бөгөөд англи, орос, герман, франц хэлний мэдлэгтэй гэжээ. Гэхдээ бусад сайд нарын хувьд бүгд орос, англи хэлний мэдлэгтэй. Д.Ганхуяг, Л.Гантөмөр нар Японд сургууль төгссөн гэдэг утгаараа японоор ус, цас. Мөн УИХ-ын гишүүн С.Оюун Чехэд сурч байсан тул чех хэлний мэдлэгтэйгээрээ сондгойрч байна.

    УИХ-ын гишүүд дундаас хамгийн олон удаа сайдаар ажиллаж байсан хүн нь Ч.Улаан юм. Насаараа ч, туршлагаараа ч бусдаасаа илүү тэрбээр нэг удаа шадар сайд, хоёр удаа Сангийн сайдаар ажиллаж байв. Харин энэ удаа дахиад л Сангийн яамандаа очлоо. Ингээд Ч.Улаан гишүүн дөрөв дэх удаагаа Засгийн газарт ажиллаж байна.
   Мөн эдгээр сайд нарын олонхи нь өнгөрсөн парламентад сууж байсан танил нөхдүүд. Засгийн 19 сайдын 17 нь УИХ-ын гишүүн байгаа бөгөөд зөвхөн Н.Удвал, А.Гансүх нар л УИХ-ын гаднаас сонгогдсон билээ. Энэ нь Засгийн газрыг тогтвортой байлгах гэсэн санаа гэж тайлбарлаж байгаа билээ.

   Энэ мэтээр шинэ Засгийн газрын өнгө төрх эрээвэр, хураавар ч нийтлэг зүйл олонтой эрхмүүдээс бүрдлээ.