УИХ-ын гишүүн Б.Бат-Эрдэнэ нарын гишүүд уламжлалт соёл сэтгэлгээг орчин үетэй хослуулах, тэднийг хүмүүнлэг энэрэнгүй иргэн болгож төлөвшүүлэх зорилгоор хуулийн төсөл боловсруулжээ.

Тэрбээр энэ талаар “Монгол хүний хүмүүжил, ёс суртахууны тухай хууль нь нийгмийн бүх хүрээг хамарна. Хүмүүнлэг боловсролын үйл ажиллагаа нь насан туршийн тасралтгүй үргэлжлэх агуулгатай юм. Дорно дахины зарим улсуудад энэ хуулийг амжилттай хэрэгжүүлж байгаа орнууд байна. Тухайлбал, БНСУ-д Хүнлэг чанар, сэтгэлийн боловсролыг дэмжих хуулийг 2015 онд парламентаараа батлуулжээ. Ерөнхийлөгчийн засаглалтай орон учраас уг хуулийг баталж, Ерөнхийлөгчдөө хариуцуулсан байна.

Судалгаа, хуулийн бүрдэл бүрэн хэмжээнд хангагдсан гэж үзэж байна. Эрдэм шинжилгээний судалгааны ажлаас аваад үзвэл өнөөдрийн нийгмийн анхаарахаас өөр аргагүй түвшинд байна. Хүчирхийллээс эхлээд гэр бүлийн салалт, өрх толгойлсон ээж, аавууд гээд анхаарах зүйлшгүй шаардлагатай. Нийгэмт үйлдэгдэж байгаа гэмт хэргийн 76.6 хувийг 15-40 насны хүмүүс үйлдэж байна. Гэмт хэрэгт өртөж байгаа хүмүүсийн 45.7 хувь нь бүрэн дунд, 17.5 хувь нь дээд боловсролтой иргэн байна. Дээд боловсролоор хүний тархинд мэдлэг олгоод байгаа ч зүрх сэтгэлийн хүн байх боловсролыг олгож чадахгүй байна. Тиймээс гэр бүлийн хүрээнд суурь хүмүүжлийг нь тавьж, цэцэрлэгийн наснаас нь эхлэн хүн байхын утга учир, хүнлэг боловсролын асуудлыг танин мэдүүлэх ёстой.

Гэхдээ бид уламжлалаасаа арай холдчихоогүй байна. Энэ үе дээр нь төрийн бодлогоор зохицуулж хадгалж үлдэх хэрэгтэй. Хуулийн төслийг УИХ-ын даргын өгсөн чиглэлийн дагуу мэргэжлийн багш, эрдэмтэдтэй хамтран хийсэн. Сургалтын бүх агуулгыг энэ хуульд нийцүүлэн явуулна. Цэцэрлэгийн багш, сургуулийн багш миний хүүхдийг хариуцах ёстой гэж ойлгож болохгүй. Хамтын оролцоо хамгийн чухал байна. Тиймээс монголын уламжлалт заншлыг залуу үе таньж мэдэх хэрэгтэй" гэлээ. 

Б.Лхам