УИХ-ын үдээс хойшхи чуулганы хуралдаанаар “Алсын хараа-2050” урт хугацааны хөгжлийн бодлогыг хэлэлцэж байна.  Хэлэлцэж байгаа асуудалтай холбогдуулан гишүүд асуулт асууж хариулт авлаа.

Б.Баттөмөр: “Алсын хараа-2050” бодлогын баримт бичигт дэвшилттэй маш олон заалт бий. Мөн засч залруулах ч зүйл бий. Хэлэлцүүлгийн явцад засч залруулах байх. Д.Эрдэнэбат гишүүнтэй санал нэг байна. 2030, 2050 гэсэн хоёр үе шаттай хэрэгжүүлэх нь зөв гэсэн санал гаргаж байна. Ер нь бид хүнээ хөгжүүлэхгүйгээр  цааш явахгүй. Хөгжлийнхөө загварыг авч үзэх ёстой. Үүний нэг нь хүний хөгжил. Тэгш бус байдлаас үүдэлтэй хүндрэл өнгөрсөн 30 жилийн үндсэн сорилт болж байна. Халамжийн бодлого үр дүнд хүрсэнгүй. Ер нь цаашид дундаж давхаргыг нэмэгдүүлэх, баялгийг тэгш болгох тал дээр анхаарах хэрэгтэй байна. Манай эдийн засаг багтаамж муутай, хязгаарлалттай учраас экспортод чиглэх ёстой. Уламжлалт зүйлээс өөр ямар ямар экспортын чиглэл байж болох вэ?

Л.Оюун-Эрдэнэ: Дэлхийн улс орнууд бусдыг шууд хуулбарлаад хөгжсөн нэг ч улс байхгүй. Улс бүр өөрийн мөн чанартай. Бидний өнгөрсөн 30 жилийн алдаа бол шууд хуулбарлах. Энэ нь Монгол Улсын хөрсөнд нутагшихгүй байсан гэдгийг эрдэмтэд ярьсан. Тиймээс нүдэнд үл үзэгдэх хөгжлийн торлог гэдэг зүйлийг гаргасан. Эзэнт гүрний түүх, нүүдлийн соёл иргэншил, хөрвөх чадвар бүхий Монгол хүн уламжлалаа маш сайн хадгалсан, дэлхийн чиг хандлагад тулгуурласнаараа онцлогтой. Жишээлбэл, бодлогын баримт бичигт анх удаа үндэсний нэгдмэл зүйл, оюун санааны дархлаатай холбоотой цогц ойлголтуудыг тусгасан.

Ажлын хэсэг: Дэлхийд олон янзын хөгжлийн загвар хэрэгжиж байна. Эдгээрийг судалж, монголын онцлог шинжтэй хослуулж боловсруулсан. Тогтвортой хөгжлийн гол цөм нь хүний хөгжил, экологи, эдийн засгийн асуудал нь бие биенээ дэмжих чиглэлээр тусгаж өгсөн.

А.Сүх