“Номадс”-ын сүлжээ ресторан энэ удаад зочид буудлын салбарт хүчээ үзэхээр орон нутаг дахь хамгийн анхны өндөр дээд зэрэглэлийн “Hotel Nine-Цогтцэций” зочид буудлын сүлжээний үүд хаалгаа Өмнөговь аймгийн Цогтцэций суманд нээлээ. Зочид буудлын нээлтийн арга хэмжээ есдүгээр сарын 7-нд болсон юм. Өмнийн говийн нэгээхэн том бүтээн байгуулалт болох зочид буудлын өрөөнүүдийн тухайд, дээд зэрэглэлийн өрөө 3, люкс өрөө 9, энгийн өрөө 28 гээд нийт 39 өрөөтэй, зочид буудал нэг дор 80 хүн хүлээн авах хүчин чадалтай. Өрөө бүр галын хамгаалалт, ослын үед ашиглах хүчдэл буурах механизмтай, үнэгүй интернэт, 00, душтэй, агааржуулах систем, утас, 25 суваг бүхий кабелийн телевизтэй. Өмнийн говийн нутаг орны онцлогыг сайтар анхаарч, агааржуулалтын системийг зочид, үйлчлүүлэгчдэд тухтай байлгах үүднээс шийдсэн. Өөрөөр хэлбэл, улирлын байдлаас хамаарч өрөөнийхөө температурыг өөрөө тохируулж, агааржуулах системийг ажиллуулах боломжтой юм. Зочид буудал нийт зургаан давхраас бүрдэх бөгөөд нэгдүгээр давхарт хүлээн авах, ресторан, модон болон уурын саун, караоке, “Aurora bar & Night club” байрлана. Караоке дөрвөн өрөөтэй бөгөөд энд дуулсан дуугаа бичиж, дүрс бичлэгтэй холбож болдог. Жишээ нь, караокед дуулсан дуугаа клипжүүлж болно гэсэн үг. “Aurora bar & Night club” нь орчин үеийн техникээр тоноглогдсон нэг дор 60-80 хүн хүлээн авах хүчин чадалтай. Амьд хөгжмийн тоглолт болон дэлхийн чанартай бүтээгдэхүүнээр үйлчлэх юм. Хоёрдугаар давхарт, уулзалтын өрөө болон хурлын танхимтай. Нэг дор 200 хүнийг цуглуулан ажил хэрэг ярих боломжтой учир агааржуулалтын системийг сайтар анхаарсан талаар гэнэ. Гурав, дөрөв, тавдугаар давхарт өрөөнүүд байрлах бол зургадугаар давхарт зочид буудлын дотоод бүлжээ, халуун, дулаан, цахилгаан гээд бүх зүйлийн механизмын тохиргоог хийдэг байна. 
Өндөр зэрэглэлийн зочид буудлын цогцолбор аятай тухтай байдлыг мэдрүүлэх үндэс суурь нь дэд бүтэц буюу инженерийн шийдэл. Энэ тал дээр зочид, үйлчлүүлэгчдийн тухыг алдуулахгүй байх үүднээс аюулгүйн бүхий л шийдлийг ашигласан. Тухайлбал, усны хангамжийг “Энержи Ресурс ” компанийн “Ухаа худаг”-ийн ус хангамжийн албатай хамтраад, цэвэр усны шугамаас худаг гаргаж усаа шийдэж байна. Өмнөговь аймгийн Цогтцэций сум 380 ваттын хүчин чадалтай цахилгаан станцтай бөгөөд үүнээс цахилгаан эх үүсвэрээ авдаг болохоор ус хангамж, болон эрчим хүчний хувьд айлтгүй байхаар шийдсэн бол том, жижиг халаалтын уурын зуухнаас зочид буудлынхаа халаалтыг хийх юм байна. Тиймээс жилийн дөрвөн улиралд, хоногийн 24 цагийн туршид хүйтэн, дулаанаа тохируулахаас гадна халуун устай байх бөгөөд тохь тухыг эрхэмлэдэг хэн бүхэнд зориулсан юм.
“Hotel Nine-Цогтцэций” зочид буудал зөвхөн үйлчилгээний салбарын үйл ажиллагаа гэлтгүй, бүс нутгийн хөгжилд нэгэн том ахиц авчирч, нийт 115 хүнийг ажлын байраар хангасан бөгөөд үүний 70% нь нутгийн иргэд, 30% нь нийслэлээс томилогдон ажиллаж буй ажилтнууд юм байна. Нутгийн иргэд ч ам сайтай байх юм. Өөрийнх нь аймагт том, сүрлэг байшин барилга сүндэрлэх тутамд, бүс нутаг улам “амьсгаа авч” шинээр сэргэж байдаг учраас тэр юм гэнэ. Ийнхүү өөрчлөлт, шинэчлэлтийн салхи Өмнийн говь тийш салхилж, улсын хөгжил сумаас гэдэг, энэ биз ээ.
