"Финансхолдинг" ХХК-ийн захирал, иргэн Б.Энхцэцэг махны экспортын квот шударга бус хуваарилагдаж байгаа талаар мэдээлэл хийлээ.

Тэрбээр “Би Жижиг, дунд өизнес эрхлэгч. Манай компани 2008 оноос эхлэн малын гаралтай түүхий эдийг боловсруулах, улмаар мах экспортлох ажил хийж байсан. Гэтэл өнгөрсөн оноос эхлэн мах экспортлох квот олдохоо болилоо. Учир нь хятад эзэнтэй компаниуд олноор мах бэлтгэж, гаргах болсонтой холбоотой юм.

Энэ тухайгаа тайлбарлаад төрийн захиргааны бүх байгууллагуудад хандсан боловч асуудлаа шийдвэрлүүлж чадсангүй.

Квот олгохгүй байгаа шалтгааныг экспортлох эрхгүй үйлдвэрт бэлтгэсэн гэж тайлбарладаг. Хятад компаниуд ч адилхан шүү дээ. Монгол Улсын иргэнд хууль үйлчлээд гадны иргэнд үйлчлэхгүй байгаад харамсаж байна. Хууль дүрэм зөрчөөд байгаа гаднын экспортлох аж ахуйн нэгжүүдэд хэн хариуцлага тооцох юм. Тэднийг дэмжээд байгаа мэргэжлийн хяналтын газрынханд хэн хариуцлага хүлээлгэх вэ. Мэргэжлийн хяналтын байгууллага бүр дунд нь орж ажилладаг.

Манай үйлдвэр 2000 тонн мах бэлтгэчихсэн ч гаргаж чадахгүй хүлээж байна. Би хоёр үйлдвэр 400 сая төгрөгөөр түрээсэлдэг. Одоо өрөнд баригдаж үнэхээр туйлдаж байна. Дөрвөн настай охиныхоо хамтаар гудамжинд гарахдаа тулчихлаа.

Манай улсад мах экспортлох эрхтэй 27 аж ахуйн нэгж байдгаас долоо нь монгол компани. Монголд мах экспортлох эрх авахын тулд хятадаас хүн ирж сонгон шалгаруулалт хийдэг юм байна лээ.

Улмаар төрийн гурван өндөрлөгт захидал бичсэний үр дүнд Засгийн газрын 18 дугаар тогтоол гарсан юм. Гэвч тогтоолыг ХХААХҮЯ нь хэрэгжүүлэхгүй байна" гэв. 

А.Сүх