Уулын оргилд хүрэх хэцүү. Түүнд хүрэхийн тулд амаргүй даваа туулна. Сул чулуу, хад асга гээд туулах даваа их. Нэгэнт уулын оргилд хүрсэн бол уруудах нь харин амархан, хормын төдий л зүйл. Үүнтэй агаар нэг үйл явдал энэ үед болж буй нь “Эрэл”-ээр овоглосон Б.Эрдэнэбаттай холбогдож байна.

Нэгэнтэй мандаж явсан тэрбээр хууль, шүүх байгууллагын хаалга татаад байна.  

Б.Эрдэнэбатын байгуулсан “Эрэл” компани баялаг түүхтэй. Анх хоршооллын чиглэлээр эвлэлдэн нэгдсэн асан бизнесмэнүүдийн суурин дээр эл компанийг босгосон гэдэг. Энэ талаар тэрбээр ““Эрэл” хэмээх хүчирхэг компани нэг л сайхан өдөр үлгэрийн шидэт саваагийн дохилтоор үүсэж бий болоогүй ээ. “Эрэл” хоршооны сууринд цэцэглэн өндийсөн юм. Харамсалтай нь, би ерөөсөө өдрийн тэмдэглэл хөтөлж байсангүй.

Тэгж хөтлөх зав чөлөө ч үнэндээ гарсангүй. Бага багаар бичиж байсан бол компанийн түүхийн талаар ном бичихэд чухаг гарын авлага болох байжээ” хэмээн Б.Эрдэнэбат захирал хожим дурсчээ.

Нээрээ л түүний хэлснээр 1990 оны ардчилсан хувьсгалын үед Монгол Улс бүхлээрээ цоо шинэ нийгмийг бүтээхтэй зэрэгцэн тус компани үндэс сууриа тавьсан байдаг. 20 гаруй охин компани байгуулсан нь, тухайн үедээ хэвлэлээр “Эрэлийн вант улс” гэж бичигдэж шалтгаан болж байв. 2000-аад оны эхэн үе Б.Эрдэнэбатын жинхэнэ тодорч эхэлсэн он цаг гэж хэлж болно. “Эрэл”-гүй, барилга, уул уурхай, сургууль соёлын газар, “Ариг” банк, хэвлэлийн үйлдвэр гэж байсангүй.

Зөвхөн бизнесийн салбар гэлтгүй улстөрд ч хүч түрсэн үе түүнд бий. УИХ-ын гишүүн, Намын дарга, Ерөнхийлөгчийн сонгуульд хүртэл нэр дэвшиж байв. 2004 онд Ардчилсан намтай хамтран “Эх Орон-Ардчилал эвсэл” байгуулж, УИХ-ын сонгуульд оролцож 34 суудал авч МАХН-тай эн тэнцэхүйц хүч үзэж байсан юм.

Гэвч дараагийн сонгууль түүнээс холуур өнгөрч. Хоёр дахь удаагаа УИХ-ын сунгаанд нэр дэвшээд өвдөг шороодсон нь түүнийг улстөрийн тавцангаас нэг мөр унахад хүргэжээ.

“Эрэл”-ийн Б.Эрдэнэбатын туулсан мөр энэ. Хэдий улстөрийн тавцангаас сугаран үлдсэн ч түүний байгуулсан компани одоо ч нөлөө бүхий байсаар байна. Энэ нь түүнийг сайн бизнесмэн гэдгийг илтгэнэ.  

Муу нь гэвэл шүүхийн хаалга татсан явдал. Тодруулбал Хөгжлийн банкнаас их хэмжээний зээл аваад төлөөгүй компаниудын дунд “Эрэл” групп нэрлэгдсэн. "Эрэл" ХХК “Байшин үйлдвэрлэх комбинат” төслөөрөө 99.5 тэрбум төгрөг авсан ч нэг ч төгрөгийн төлөлт хийгээгүй баримтыг өнгөрсөн онд ЗГХЭГ-ын дарга Л.Оюун-Эрдэнэ дэлгэсэн билээ.

“Зээлээ төлж байгаа. 2026 онд төлөгдөж дуусна” хэмээх Л.Оюун-Эрдэнэ сайдын баримтыг үгүйсгэсэн ч эцсийн шийдийг шүүх л гаргана гэсэн үг.

Өнөөдөр түүнийг гэм буруутай эсэхийг шүүх тогтоох юм. Түүнийг Эрүүгийн хуулийн тусгай ангийн 17.3 дугаар зүйлийн 2 дахь хэсгийн 2.2 дахь  заалтад зааснаар /Залилах/, мөн хуулийн 18.6 дугаар зүйлийн 2 дахь хэсгийн 2.2 дахь /Мөнгө угаах/ заалтад зааснаар /Мөнгө угаах/ гэмт хэрэгт Б.Эрдэнэбат нарыг тус тус холбогдуулж, яллах дүгнэлтийг нийслэлийн прокуророос үйлдээд байгаа юм. Б.Эрдэнэбатыг шүүхээс буруутай гэж үзвэл 2-8 жилийн хорих ялтай.

Б.Лхам