Мэргэжлийн хяналтын ерөнхий газраас цаг үеийн асуудлаар мэдээлэл хийлээ.

Мэдээллийн эхэнд МХЕГ-ын Эрүүл ахуй, халдвар хамгааллын хяналтын улсын ахлах байцаагч Л.Гэрэлмаа “Халдвар хамгааллын дэглэм баримтлах асуудалд тусгайлан боловсруулсан дэглэм бий. Үүний дагуу, сургалтын байгууллагууд бэлэн байдлаа хангах шаардлагатай байна.

Сургууль, цэцэрлэгүүдийн ойр орчим болон сургуулийн байр, дотуур байр, барилга байгууламжуудад мэргэжлийн байгууллагаар халдваргүйтгэл хийлгэнэ.

Мөн бүх багш, ажилчдыг коронавирусний халдвараас урьдчилан сэргийлэх чиглэлийн сургалтад хамруулах зөвлөмж өгч ажиллалаа.

Халдвар хамгааллын дэглэмийг мөрдүүлэх зорилгоор сургуулийн эмч, нийгмийн ажилтнууд сурагчдыг хичээлдээ ирэхэд нь биеийн халууныг хэмжиж, тандалт судалгаа хийж ажиллана” гэлээ.

Засгийн газрын шийдвэрээр 2 хүртэлх насны хүүхдийг сургуулийн өмнөх боловсролд хамруулахгүй байх шийдвэр гарсан. Уг шийдвэрийн хүрээнд мэргэжлийн хяналтын байгууллагаас хяналт, шалгалт хийж ажиллах бөгөөд зөрчил гаргасан тохиолдолд хуулийн дагуу хариуцлага хүлээлгэхээ мэдэгдлээ.

А.Сүх