Монголын Үндэсний Олимпийн хорооны ээлжит бус хуралдаанаар Хөдөлмөрийн баатар Н.Түвшинбаярыг ерөнхийлөгчөөрөө сонгосон. Н.Түвшинбаяр ерөнхийлөгч болж, үйл ажиллагаа нь шинэчлэгдсэнтэй холбоотойгоор гишүүн байгууллагын удирдлагын бүтцэд хөдөлгөөн орох нь. Тодруулбал, Монголын Боксын холбооны ерөнхийлөгч УИХ-ын гишүүн Д.Бат-Эрдэнэ үүрэгт ажлаа өгөхөөр болж байгаа юм. Учир нь, шинэчлэн найруулсан хуулийн хүрээнд төрийн өндөр албан тушаалтан, тэр дундаа УИХ-ын гишүүн Төрийн бус байгууллагын удирдлагаар ажиллах эрх нь хаалттай болсон.

Үүгээр УИХ-д дахин сонгогдсон, АН-ын бүлгийн гишүүн Д.Бат-Эрдэнэ Монголын Боксын холбооны ерөнхийлөгчийн албан тушаалаа өгөхөөр болж байгаа юм.

Уг асуудалтай холбогдуулж, Боксын холбоог тэргүүлэх зарим хүний нэр тодорч эхэлжээ. Тэдгээрийн нэг нь “МАК”-ын Б.Нямтайшир.

Түүний хувьд 2017 оны нэгдүгээр сард Монголын боксын холбооны Их хурал болох үеэр Нийслэлийн Засаг дарга С.Батболдын хамт өрсөлдсөн ч Д.Бат-Эрдэнийг улираах шийдвэр гаргаж байв.

Харин энэ удаад УИХ-ын гишүүнээр сонгогдсон Д.Бат-Эрдэнэ хуулийн хүрээнд ажлаа өгөх шаардлага тулгарсан нь Б.Нямтайширт дахин боломж гаргасан бололтой.  

Эх сурвалжийн хэлж буйгаар Монголын ширэн бээлийтнүүд энэ удаад Б.Нямтайширыг дэмжихээ илэрхийлж байгаа гэнэ. “Ажнай” нэрээрээ олонд танигдсан Д.Бат-Эрдэнэ нь 2013 оны дөрөвдүгээр сарын 4-нд Монголын Боксын холбооны ерөнхийлөгчөөр сонгогдож, 2017 онд улирсан нэгэн.

С.Сүлд