Засгийн газрын өнгөрсөн долоо хоногийн ээлжит хуралдаанаар Шударга өрсөлдөөн, хэрэглэгчийн төлөө газрын шинэ даргыг томилсон. Тодруулбал, Ерөнхий сайд У.Хүрэлсүх Б.Лхагвын оронд тус байгууллагын дэд даргын албыг хашиж байсан Б.Бат-Эрдэнэд итгэл хүлээлгэсэн юм.

Төрийн байгууллагын дарга нар өрөөнөөсөө хянаж, иргэдийг дугаарлаж харьцдаг гэх шүүмжлэл нийгэмд бий. Тэгвэл шинэ даргын хийх эхний ажил энэ байдлыг халах гэнэ. Дарга иргэдийг өрөөнөөсөө хянаж биш иргэд дарга хэрхэн ажиллаж байгааг үүднээс нь хянах боломжийг бүрдүүлж, зөв жишиг тогтоожээ.

Шударга өрсөлдөөн, хэрэглэгчийн төлөө газар бол хэрэглэгчийн эрх ашгийг хамгаалах үндсэн үүрэгтэй. Нөгөө нь зах зээлийн шударга өрсөлдөөнийг бий болгох явдал юм. Нэг номерын үүргээ ухамсарласан нь сайн хэрэг. Тэрбээр энэ талаар “Үйлчлүүлэгч, иргэд дарга нарыг хардаг болгох ажлыг эхлүүлнэ. Өөрийнхөө өрөөнөөс эхлүүлье" хэмээн цахим хуудастаа тэмдэглэжээ. Энэ нь ил тод байдал, авлига, хүнд сурталыг халах нэг алхам болно гэж найдаж байгаагаа мөн хэлсэн юм.

Алгын чинээ цаас гаргуулж авах гэж төрийн албан хаагчийн өрөөний үүдийг хэдэн цагаар сахиж суудаг нь нууц биш.

Тийм ч учраас төрийн албанд танилгүй бол ажил бүтэхгүй гэх яриа гарч иргэд ажлаа бүтээхийн тулд дарааллаар биш хамгийн түрүүнд танил тал хайж эхэлдэг. Нөгөөтээгүүр, төрийн албаны хүнд суртлыг арилгах зорилго тавьдаг ч дорвитой өөрчлөлт гараагүйг МҮХАҮТ, Азийн сангийн хамтран явуулдаг төрийн албаны хүнд суртлын тайлангаас харагддаг. Судалгаанд оролцогсдын 53 хувь нь төрийн алба хүнд сурталтай гэж хариулсан нь үүнийг гэрчилнэ. 

Тэгвэл энэ байдал удахгүй халагдах нэг гэрэл харагдаж эхэллээ. Одоо түүний эхлүүлсэн зөв жишгийг төрийн байгууллагууд мөн хэрэгжүүлэх нь чухал. 

А.Сүх