Өвөрмонголын сурагчдад монгол хэл, бичиг заахыг хориглосон Хятадын шийдвэрийг эсэргүүцэж багш, эцэг эхчүүдийн зүгээс тэмцэл өрнүүлж буй.

Тэгвэл уг асуудалтай холбогдуулан Монгол Улсын дөрөв дэх Ерөнхийлөгч Ц.Элбэгдорж өөрийн байр сууриа цахим хуудсаараа дамжуулан илэрхийллээ. Тэгрбээр “Өвөрмонголчуудын монгол хэл, бичгийнхээ төлөө хийж байгаа тэмцлийг дэмжиж байгаа. Дэлхийн хаана ч амьдардаг бай монгол хүн болж төрсөн л бол энэ тэмцлийг дэмжих ёстой. Монгол хэлгүй бол монгол хүн гэж үгүй. Монгол хэлийг тасадвал толгойгоо тасдуулсантай адилхан. Монгол хэлгүй бол толгойгоор яах юм. Бичихгүй бол гараар яах юм.

Хичээл эхэллээ. Хичээл эхлэдэх хүүхдүүддээ монгол хэлээ заадаг, илэрхийлж байгаа үгээ монгол хэлээрээ бичдэг эрхээ хадгалъя гэж тэмцэж байгаа Өвөрмонголын багш, эцэг эхчүүд, оюутнуудын хэлж ярьж байгаатай санал нэг байна.

БНХАУ-ын дарга Си Жиньпин бусдын хэл соёлд хүндэтгэлтэй ханддаг гэж би ойлгодог. Ялангуяа монгол хэл, бичиг, уламжлал соёлд хүндэтгэлтэй ханддаг гэж ойлгодог. Гэтэл тэнд байгаа монголчуудыг доош нь дарах гэсэн нэг хэсгийн бодлого яваад байна уу гэж харж байна. Өмнө нь төрийн ажил хийж байхдаа энэ байр сууриа илэрхийлдэг байсан.

Есдүгээр сарын 1-ээс хичээл сургууль эхлэдэх хүүхдүүдээ монгол хэл, бичгээ заадаг монгол хэлээрээ ярьдаг энэ эрхийг нь эдлүүлэх ёстой. Өвөрмонголчуудын монгол хэлээ хадгалж үлдсэн гавьяаг үнэлдэг. Энэ үйл ажиллагаа үргэлжлэх ёстой. 300 жил монголчуудын хэл соёл, агуу түүхийн эсрэг явсан доромжлол шинэ зуунд үргэлжлэх ёсгүй” гэлээ.

А.Сүх