Өнгөрсөн амралтын өдрүүдэд гурил, талхны үнэ нэмэгдэж эхэлсэн. Үүнтэй холбоотой асуудлаар ШӨХТГ-аас шалгалтын ажиллагааг явуулж эхэлжээ. 

Гурил, талхны үнэ нэмэгдсэн шалтгаан нь үйлдвэрүүд техник, тоног төхөөрөмжийн шинэчлэл хийсэнтэй холбоотой гэж тайлбарлажээ. Энэ нь үнэ нэмэх шалтгаан болохгүй гэдгийг ШӨХТГ-ын дарга Б.Бат-Эрдэнэ мэдэгдсэн юм. 

Тэрбээр энэ талаар "Төрөөс олгох ёстой хөнгөлөлт урамшуулал болон чөлөөлөх ёстой гааль, татвараас чөлөөлсөн. Үнэ нэмэгдэх болсон нөхцөлийг Олон улсын стандартад шилжиж дэлхийтэй хөл нийлүүлэх, техник тоног төхөөрөмжийн шинэчлэл хийсэн, ажилчдаа халаагүй гэдэгтэй холбон тайлбарлаж байна. Энэ нь гурил, талх нэмэгдэх үндэслэл болохгүй.

Өнөө, маргаашдаа багтаан өсгөсөн үнийг буулгахыг шаардлаа.

Үйлдвэрлэгчээс үндсэн үнээр нийлүүлж байгаа ч худалдан борлуулагч нар үнэ өсгөн худалдаалж байгаа асуудлууд гарсан. Тухайн ААН-үүдэд албан шаардлага хүргүүлж, Өрсөлдөөний тухай хууль, Гамшгаас хамгаалах тухай хуулийн холбогдох зүйлээр арга хэмжээ авна. Үндэслэлгүй үнэ нэмсэн ААН-үүдэд Татвар, Гааль, Мэргэжлийн хяналт, Шударга өрсөлдөөн хэрэглэгчийн төлөө газар, Онцгой байдлын гамшгийн үеийн улсын хяналтын байцаагч нарын хамтарсан шалгалтыг хийнэ" гэлээ. 

А.Сүх