Цагаанхад-Гашуунсухайт чиглэлд нүүрс тээвэрт явж буй жолооч нарын амь нас эрсдэж буй талаар болон тэдний цалин хөлс, нийгмийн асуудлаар “Тээвэрчдийн зөвлөл”-өөс мэдээлэл хийлээ.

Сүүлийн 30 хоногийн дотор гурван тээврийн жолооч цаг бусаар амиа алдаж, гурван тээвэрчин хүнд бэртжээ. Энэ талаар “Тээвэрчдийн зөвлөл”-ийн тэргүүн н.Саарал “Дахин нэг ч жолооч хөлдөж үхэхгүй, угаартахгүй, замын хагархайгаас болж үхэхгүй гэсэн Ерөнхий сайдын амлалт, өнгөрсөн онд түүний гаргасан албан даалгаврын хэрэгжилт хаачсан юм бэ.

Ерөнхий сайдыг Засгийн газрын тэргүүн гэхээс илүү амрийн хурандаа гэдэг утгаар нь хүндэлж явдаг. Ажлаа хийвэл хийгээд хийхгүй бол зайл гээд байсан. Гэтэл хариулага алдсан албан тушаалтнуудын хэн нь ч хариуцлага хүлээсэнгүй. Өдөрт найман сая ам.долларын хөрөнгө оруулж байгаа нүүрсний экспорт гэж яриад байдаг. Үүнийг хүмүүс зөөдөг юм шүү. Яагаад хүн рүүгээ чиглэсэн ажил хийж болдоггүй юм бэ гэдгийг сайд нараас асуумаар байна. Тог цахилгаангүй бүсэд 14 мянган хүн суурьшдаг. Тэнд байгаа олон мянган жолооч айдастай байна.

Нүүрсний жолоочид гэр бүлээ тэжээхийн тулд азандаа найдаж тээвэрт гардаг. 120 тонн ачаатай тээврийн хэрэгслийг хөдөлгөөн амар байдаггүй. Тойроод гарах боломжгүй нүх зам дээр зөндөө гарч ирдэг. Ийм байдалтай дөрвөн жил болж байхад одоог хүртэл бөглөөгүй. УУХҮ-ийн сайд Г.Ёндон болон Л.Оюун-Эрдэнэ сайд аа, инээгээд л гадуур нисдэг тэрэг хөлөглөөд байдаг. Сэрээч ээ. Нүүрсний тээвэрчдэд та бүхний анхаарал хэрэгтэй байна" гэлээ. 

А.Сүх