Монгол Улсын гадаад харилцааны сайд Н.Энхтайваны урилгаар БНХАУ-ын төрийн зөвлөлийн гишүүн, гадаад хэргийн сайд Ван И энэ сарын 15-16-ны өдрүүдэд манай улсад айлчлахаар болжээ.

Айлчлалын үеэр халдвар хамгааллын дэглэмийг чанд мөрдөх бөгөөд уулзалтын дараа тэдэнд үйлчилсэн хүмүүсийг хорио цээрийн дэглэмийн дагуу шинжилгээ авч 14 хоног тусгаарлах талаар ЭМЯ-ны Төрийн нарийн бичгийн дарга Я.Амаржаргал танилцууллаа.

Тэрбээр “Хятадын талаас ирж байгаа бүх төлөөлөгчдөд PCR-ийн шинжилгээ хийнэ. Хариуг хурдан хугацаанд 6-8 цагийн хооронд гаргахаар бэлдсэн. Айлчлалын үеэр хоол идэх танхим, хоорондын зай зэрэг бүх үйл ажиллагааг зохицуулсан. ЗӨНҮТ-ээс нислэгээр ирж байгаа ачаа тээш зэргийг ариутгана. Төлөөлөгчдийн байрласан газрыг ирэхээс нь өмнө болон ирээд явсны дараа халдваргүйжүүлнэ.

Айлчлал дууссаны дараа яриа хэлэлцээрт оролцсон, үйлчилсэн бүх хүмүүсийг 14 хоногийн хугацаанд тусгаарлана. Халдвар авахгүй байх шаардлагыг хангаж байж гэрээ хэлэлцээр хийгдэх юм.

Мөн нэмэлт мэдээлэл өгөхөд Засгийн газрын нөөц хөрөнгөөс 500 орчим мянган иргэнийг дархлаажуулах вакцин худалдан авахаар болсон” гэлээ.

Айлчлалын үеэр Хятадын гадаад хэргийн сайд төрийн гурван өндөрлөгт бараалхах эсэх асуудал одоогоор шийдэгдээгүй байгаа аж. Хэрэв уулзалтад оролцвол халдвар хамгааллын дэглэмийн дагуу мөн адил 14 хоног тусгаарлагдах юм.

А.Сүх