Монголын нэгдсэн хүүхэд харах үйлчилгээ эрхлэгчдийн холбооноос хүүхэд харах үйлчилгээний талаар мэдээлэл хийлээ.

Энэ оны хувьд цар тахлын онцгой дэглэмтэй холбогдуулан хоёр настай хүүхдийг СӨБ-д хамруулахгүй байх шийдвэр гарсан. Улмаар эмэгтэй гишүүдийн санаачилгаар улсын төсвийн тодотголд хоёр тэрбум төгрөг хүүхэд харах үйлчилгээнд зарцуулахаар суулгасан. Ингэснээр хоёр настнууд хүүхэд харах үйлчилгээ буюу сургуулийн өмнөх боловсролыг авах боломжтой болсон юм.

Манай улсад бүрэн дундаас дээд боловсролтой, тусгай сертификат авсан, сэтгэцийн өөрчлөлтгүй, гэмт хэрэгт холбогдож байгаагүй 18-65 насны иргэн хүүхэд харах боломжтой гэж заасан.

Энэ хүрээнд маргаашнаас үйл ажиллагаа нь эхлэх 160 гаруй хүүхэд харах төвд мэргэжлийн 1100 орчим хүүхэд харагч бэлтгэгджээ. Хүүхэд харах үйлчилгээг үзүүлэхдээ нэг сургагч багш таван хүүхэд хариуцаж авах байдлаар явуулах юм байна.

Энэ талаар тус холбооны удирдах зөвлөлийн гишүүн Б.Өлзий “Анх 2016 оноос хойш хүүхэд харах үйлчилгээ үйл ажиллагаа явуулж эхэлснээс хойш дөрвөн жилийн хугацаанд 21 мянган хүүхэд хамрагдаад байна. Маргаашнаас хүүхдээ авч эхэлнэ. 2-3 хүртэлх насны 74 мянган хүүхэд бий. Үүнээс 3000 орчим нь хамрагдана. Хоёр тэрбум гэдэг 100 ортой нэг цэцэрлэг барих мөнгө. Энэ долоо хоногт БСШУ-ны яамнаас хүүхэд харах үйлчилгээний түр журам боловсруулж гаргасан” гэлээ.

Нэг хүүхдийн хувьсах зардалд улсаас сар бүр 136 мянган төгрөг төлдөг. Уг мөнгөний 60 орчим хувьтай тэнцэх хэмжээний мөнгийг хүүхэд харах үйлчилгээ үзүүлсний төлбөрт эцэг эхээс авч болно гэж заажээ. Энэ жилийн хувьд хүүхэд харах үйлчилгээний төлбөрийн дээд хязгаар нь 150 мянган төгрөг. Хэрэв энэ хязгаараас давбал БСШУ-ны яаманд мэдэгдэх боломжтой гэлээ.

А.Сүх