Гаалийн байгууллага хил дээрх хяналт шалгалтынхаа хүрээнд манайдаа л ховор эм ургамлыг гадагш гаргахгүйгээр хянадаг болсон. Үүний нэг нь дэрэвгэр жиргэрүү хэмээх ургамал юм. Мэнэнгийн талд ургадаг энэхүү ургамлыг монголчууд хятадуудад нэг кг-ийг нь 6000 төгрөгөөр зарж, борлуулдаг байна. Дэрэвгэр жиргэрүү нь манай орны ховор ургамлын жагсаалтад орсон ба БНХАУ, БНСУ-д хүн орхоодойг орлуулж, хүнсний нэмэлт бүтээгдэхүүн үйлдвэрлэхэд хэрэглэдэг аж.

Тиймээс л нэн хэрэгцээтэй тус ургамлыг гадагш гаргах гэсэн иргэдийн хууль бус үйлдэл эрчимжсээр байна. Энэ сарын 9-ний өдөр гэхэд л Замын-Үүд дэх Гаалийн хяналтын бүсээр Монгол Улсын иргэн Г нь өөрийн тээврийн хэрэгслийн чиргүүлийн доод хэсгийн ус хадгалах сав, болон дугуйнд 310 кг дэрвэгэр жиргэрүү ургамлын үндсийг нууж, улсын хилээр хууль бусаар гаргах гэж байсныг гаалийн байгууллага илрүүлэн шалгаж эхэлжээ.

Мөн Монгол Улсын иргэн Ө.Э нь 84-73 УБЛ улсын дугаартай, Норд бенз маркын автомашины чиргүүлд ачсан нүүрсэн дор 45 шуудай бүхий 1350 кг дэрэвгэр жиргэрүү ургамлын үндсийг нуусан байсныг гаалийнхан илрүүлж, хэргийг шалгуулахаар цагдаагийн байгууллагад шилжүүлсэн байна.