Сидней-Сэбү-Улаанбаатар чиглэлийн тусгай үүргийн онгоцоор өнгөрсөн наймдугаар сарын 29-нд эх нутагтаа ирж "DREAM" зочид буудалд тусгаарлалтад байсан 14 хүн өчигдөр шөнө буюу есдүгээр сарын 14-нд хоолны хордлого авч ХӨСҮТ-д хүргэгджээ. Тус зочид буудлын 402 тоотод тусгаарлалтад байсан иргэн энэ талаарх мэдээллийг өөрийн  твиттер хаягаараа жиргэсэн аж. Өнөөдрийн байдлаар 13 том хүн, нэг хүүхэд хордлого авсан оноштойгоор ХӨСҮТ-д  хэвтэн эмчлүүлж байгаа ба тэднээс шээс, өтгөн, бөөлжис, цусны шинжилгээ авсан байна.

Энэ талаар ЭМЯ-наас тодруулахад "Тусгаарлалтын байрнаас 14 иргэнийг ХӨСҮТ-д хүргэсэн. Ямар шалтгаанаар гэдгийг тодруулахаар яг одоо ажиллаж байна. Дэлгэрэнгүй мэдээллийг УОК-ын Шуурхай штаб өгөх байх” гэлээ.

Харин УОК-ын Шуурхай штабаас тодруулахад "Тусгаарлалтад байсан 14 иргэнийг ХӨСҮТ-д хүргэсэн гэсэн мэдээлэл байна. Иргэдээс нарийвчилсан шинжилгээ авсан. Хариу нь 72 цагийн дараа гарна. Тэр цагт л юунаас болж хордсон нь тодорхой болно” гэлээ. 

Хордлого авсан хүмүүсийн биеийн байдал өнөөдрөөс хэвийн болжээ.  Тэд зочид буудлын хоолыг идээд энэ сарын 12-ны өдөр гэдэс хүчтэй базалж, гүйлгэж эхэлсэн. Есдүгээр сарын 11-ний өдрийн хоолны мах нь удаж, хуршсан амттай байсан. Сүүлийн хоёр өдөр өөр өөр хоол өгсөн болохоор яг ямар хоолноос хордсоноо мэдэхгүй байна” гэжээ.