Сүүлийн өдрүүдэд ихэнх нутгаар эрс сэрүүсч, шөнөдөө хасах хэм рүү орсноос айл өрх галлагаагаа эхэлжээ. Харамсалтай нь, хүйтэрсэн эхний өдрөөс л угаарын хийд хордсон дуудлага мэдээлэл холбогдох газруудад тасралтгүй ирж, өнгөрсөн хоёр хоногт нийт 70 гаруй хүн эмнэлгийн тусламж авчээ. Баянзүрх, Сүхбаатар, Чингэлтэй, Сонгинохайрхан дүүрэгт энэ сарын 13-14-нд шилжих шөнө  38 иргэн угаартсан гэх дуудлага ирүүлсэн бол өнгөрсөн шөнө 32 хүн угаартаж, эмнэлгийн тусламж, зөвлөгөө  авчээ.

Тухайлбал, нийслэлийн Сүхбаатар дүүргийн XII хорооны иргэн Б болон 4-11 насны таван хүүхэд угаартаж, бөөлжих шинж тэмдэгтэйгээр Улсын нэгдүгээр төв эмнэлэгт хандаж, тусламж авсан байна. Мөн Сонгинохайрхан дүүргийн XXXIII хорооны иргэн 30 настай эрэгтэй, 28 настай эмэгтэй, таван настай эмэгтэй гэртээ угаартсан. Баянзүрх дүүргийн IҮ хорооны оршин суугч 29 настай эмэгтэй А, 9 настай эрэгтэй У, 3 настай эмэгтэй Х нар гэртээ угаартсан байна. Цагдаагийн байгууллагынхан угаартсан хэргийн дийлэнх нь зуухныхаа янданг сугалж, өрхөө бүтээснээс болсон  байж болзошгүйг хэлж, энэ талаарх сэрэмжлүүлгийг иргэдэд хүргэлээ.