Монгол Улсын Гавьяат жүжигчин, Зууны манлай эстрадын дуучин, поп хатагтай Б.Сарантуяа жил бүрийн дөрөвдүгээр сарын 20-нд төрсөн өдрийн баяраа фенүүдтэйгээ тэмдэглэдэг уламжлалтай. Энэ жилийн хувьд “Ковид-19”-ийн улмаас ойн баяраа тэмдэглэж чадаагүй юм.

Харин тэрбээр тэгш тоотой 50 насны төрсөн өдрөө тэмдэглэхгүйгээр өнгөрөөхөд харамсалтай санагдсан тул хүү Эрхэмбилэгийнхээ төрсөн өдөртэй давхцан есдүгээр сарын 18-нд хамт тэмдэглэхээр болжээ.  Энэ өдөр бүхий л цаг үеийг байлдан дагуулсан хит дуунаасаа бүрдсэн “Best of Saraa” тоглолтоороо фэнүүдтэйгээ уулзах нь.

Поп дуучин Б.Сарантуяа нэгэн цагт ая зохиогч Б.Ангирмаатай хамтран “Энэ насны минь хийморь болсон эрхэм билэг бидэнд заяажээ” гэх сайхан дууг эгшиглүүлсэн түүхтэй. Сонирхуулахад, есдүгээр сарын 18-нд “альтернатив” Отгоо, “Солонгон аашт” Т.Ананда гэх олны танил бүсгүйчүүдийн төрсөн өдөр тохиодог байна. “Sky Resort” поп дуучин Б.Сарантуяатай хамтран ажиллахаар болсон ба хөл хорио тавигдсаны дараах хамгийн анхны нижгэр  тоглолт энэ болох нь. Дашрамд, үзэгчдийн тоо хязгаартай гэсэн шүү.