Нийслэл хотод нэг өдөрт 600 мянга гаруй автомашин хөдөлгөөнд оролцдог. Дугаараар нь хязгаарлаад ч автомашины түгжрэл буурах нь бүү хэл улам ихэссээр байгаа. Тиймээс ЗЦГ-аас RF ID буюу телекамерын ухаалаг системийг ирэх аравдугаар сарын дунд үеэс нэвтрүүлэхээр болжээ. Үүнд, торгуулиа болон татвараа төлөөгүй, өндөр торгуультай, оношилгоонд тэнцээгүй тээврийн хэрэгслийг нийслэлийн төвийн бүс рүү оруулахгүйгээр зохицуулах аж.

Ямар нэгэн асуудалгүй тээврийн хэрэгслийг л Бага тойруу, Их тойруу зэрэг нийслэлийн төв рүү нэвтрүүлэх юм байна. Өнөөдрийн байдлаар гэхэд л, торгуулиа төлөөгүй дөрвөн сая 500 мянган удаагийн тохиолдол бий аж.

Найман сая төгрөгийн торгуультай жолооч ч замын хөдөлгөөнд хэвийн оролцоод явдаг. Үүнийг нь төлүүлэх хөшүүрэг байхгүй учраас иргэд ийнхүү хэнэггүй хандах болжээ. Тиймээс л дээрх шийдвэрийг хэрэгжүүлэхээр болж, бэлтгэл ажлаа хангаж эхэлсэн байна.

Тус газраас авто зогсоолын нэгдсэн системийг аравдугаар сараас нэвтрүүлэхээр төлөвлөөд байгаа аж. Нийслэлийн хэмжээнд төрийн болон хувийн хэвшлийн 150 гаруй зогсоол байдаг. Тиймээс төр, хувийн болон нийтийн эзэмшлийн бүх зогсоолыг нийслэлийн эзэмшилд авч, 575 байршилд 25 мянган автомашины зогсоолыг бий болгох аж.

Ингэснээр хотын А бүсэд автомашинаа хоёр цагаас илүү хугацаагаар орхих боломжгүй болжээ. Төрийн байгууллагын ажилтнууд зогсоолд автомашинаа өглөөнөөс орой болтол тавьж, зогсоол бөглөдөг явдал үүнээс үүдэн цэгцэрнэ гэж үзжээ.

Энэ тохиолдолд тухайн иргэн нийтийн тээвэр юмуу такси үйлчилгээ сонгохоос өөр аргагүй болж байгаа юм. Энэ мэтчилэн замын түгжрэлийг хэрхэн бууруулах талд замын цагдаагийн албаныхан ихээхэн ажлыг төлөвлөн, хийж хэрэгжүүлэхээр ажиллаж байгаа аж.

У.Гэрэл