Улсын драмын эрдмийн театрын уран бүтээлчид Лев Толстойн “Анна Каренина” зохиолыг Монголд анх удаа тайзны бүтээл болгон толилуулахаар болоод байгаа билээ. Аравдугаар сарын гуравны өдрөөс үзэгчдийн хүртээл болох тус жүжгийн талаар өнөөдөр уран бүтээлчид нь мэдээлэл хийлээ.

СТА Н.Баярмаа, АЖ Н.Сувд, СТА Т.Сэргэлэн, О.Гэрэлсүх, МУГЖ Б.Жаргалсайхан, СТА Д.Баттөмөр, МУГЖ Г.Урнаа, Д.Хулан, О.Хонгорзул, МУГЖ Л.Дэмидбаатар нарын 70 гаруй уран бүтээлч оролцон тоглосон “Анна Каренина” сонгодог жүжгийн найруулагчаар Төрийн соёрхолт Н.Наранбаатар ажилласан юм.

Харин Норовын Пүрэвдагва романыг жүжгийн зохиол болгон бичсэн бол зураачаар Соёлын тэргүүний ажилтан Т.Ганхуяг, хөгжмийн зохиолчоор Соёлын тэргүүний ажилтан Ш.Өлзийбаяр нар ажилласан байна.

Н.Наранбаатар:"Анна Каренина"-д амьдралын философи оршдог

Жүжгийн найруулагч Төрийн соёрхолт Н.Наранбаатар "Өнгөрсөн гуравдугаар сарын 8-ны өдөр нээлтээ хийхээр төлөвлөж байсан "Анна Каренина" жүжиг маань цар тахал гарсантай холбоотойгоор хойшилж, хүлээлт үүсгээд байсан. Харин тун удахгүй бид үзэгчидтэйгээ цоо шинэхэн уран бүтээлээрээ уулзах гэж байна. Лев Толстойн “Анна Каренина” нь хэдийгээр 19 дүгээр зууны үеийн зохиолч гэлээ өнөөдөр дэлхийн улс орон бүрт бүх насныхан шимтэн уншисаар байна. Энэхүү зохиол нь хэн, хэдэн насны хүн уншиж байгаагаас шалтгаалан хүн бүрт өөр өөрийн бодрол эргэцүүллийг төрүүлж чаддаг дэлхийн сонгодог зохиол юм. Нэг үгээр хэлбэл амьдралын философи оршдог гэдгээрээ зохиол онцлогтой".

Энэхүү зохиолд гарах хүмүүсийн араншин, нэгнээ чичилсээр байгаад ямар аймшигтай байдалд хүргэж болдог тэр үзэгдэл өнөөгийн нийгэмд яг адилхан үзэгдэх болсон нь найруулагчийн сэтгэлийг эмзэглүүлж, зохиолыг жүжгийн хэлбэрт оруулж, тайзны бүтээл болгоход нөлөөлжээ. 

Энэ талаар Н.Наранбаатар найруулагч "Анна бол алдартай дуучин, жүжигчин, улстөрч, нийгмийн том зүтгэлтэн биш, жирийн нэг бүсгүй. Энэ жирийн нэг бүсгүйн амьдралыг тухайн цаг үед нийгэм даяараа шуугин хэлэлцэж, эцэст нь амиа хорлохоос аргагүй нөхцөлд хүргэж байна. Хүний хөнжлийг битгий сөх, өөр өөрийн замаар л яв, хов жив бүү хөөцөлд, бүтээлч бай гэсэн утга энэ зохиолын цаана оршиж байна. Бид ийм л эмгэнэлтэй байдалд орчихоод байна" гэсэн юм. 

Өдгөө манай улсад оюуны тусгаар тогтонол алдагдаад байгаа учир энэхүү жүжгээс ухаарал, амьдрах итгэл, дүгнэлт хийгээсэй гэж хүсч жүжгийн зохиолоо олны хүртээл болгож байгаа гэдгээ найруулагч онцолсон.

Мөн Дэлхийн том театрууд "Анна Каренина" зохиолыг жүжиг болгон тавьдаг. Үүний ард жүжигчдийн ур чадвар, мэдлэг оюун дээшилж байдаг. Нөгөө талаар үзэгчдийн оюуны тусгаар тогтнолыг бэхжүүлэхэд тус жүжгийн гол зорилго оршиж байна. Лев Толстойн хэлсэн "Хүн бүхэн ертөнцийг өөрчлөх тухай боддог. Харин өөрийгөө өөрчлөх тухай хэзээ ч боддоггүй" гэсэн үгэн дээр гишгэлж энэ бүтээлээ хийсэн" гэлээ.

Жүжгийн зохиолын гол дүр болох "Анна Каренина"-гийн дүрийг СТА Н.Баярмаа бүтээж байгаа бол мөн түүнийг дотоод ертөнцийг илэрхийлэх "Анна Каренина"-гийн дүрийг АЖ Н.Сувд бүтээсэн байна. Энэ мэт найруулагч жүжгийн зохиолыг сонирхолтой анхаарал татахуйцаар найруулжээ. 

СТА Н.Баярмаа: Аннаг тодорхойлж чадахгүй бол миний энэ дүрд тоглосон зорилго биелэнэ

"Анна Каренина" жүжгийн гол дүрийг СТА Н.Баярмаа "Энэхүү жүжгийн гол дүрийг бүтээж байгаадаа маш их баярлаж байна. Жүжгийн зохиолд эмэгтэй хүний амьдрал, амьдралд тохиох нарийн мэдрэмжүүдийг тод тусгаснаараа онцлог. Тиймээс ч тэр торгон мэдрэмжүүдийг ил гаргаж, үзэгчдэд хүргэхээр хичээж ажиллаж байна. "Анна Каренина"-г үзээд тэрхүү эмэгтэйг тодорхойлж чадахгүй бол миний энэхүү дүрд тоглосон зорилго биелэх болно" гэлээ.  

Дашрамд сонирхуулахад "Анна Каренина" жүжгийн тасалбар суудлын зэрэглэлээсээ хамаарч 30-100 мянган төгрөгийн үнэтэй худалдаалагдаж байгаа юм.