Нийслэлийн Засаг даргын есдүгээр сарын 15-ны өдрийн А/1114 тоот захирамжийн дагуу диско болон бүжгийн баарны үйл ажиллагааг нээхтэй холбогдуулан НМХГ-ын даргын 2020 оны 09 дүгээр сарын 16-ны өдрийн 02-01/3788 дугаартай “Covid-19” шинэ төрлийн короновируст халдвараас урьдчилан сэргийлэх тухай албан мэдэгдэлийг аж ахуйн нэгжүүдэд хүргүүлсэн.
Мэдэгдэлд заасан 18 заалт бүхий даалгаврын хэрэгжилтийг 2020 оны 09 дүгээр сарын 26-29-ны өдрүүдэд 6 дүүргийн 66 диско болон бүжгийн бааруудыг хамруулан цагдаагийн албан хаагчидтай хамтран шөнийн хяналт, шалгалтыг зохион байгуулж ажиллажээ.
Шалгалтад хамрагдсан 66 аж ахуйн нэгжийн баарны 17 нь стриптиз баар, 49 нь диско баар бөгөөд бүгд согтууруулах ундаагаар үйлчлэх тусгай зөвшөөрөлтэй байна.
Үйл ажиллагаагаа эхлэхээс өмнө 64 баар нь мэргэжлийн байгууллагаар халдваргүйжүүлэлт хийлгэсэн тухай акттай, 58 нь короновируст халдвараас урьдчилан сэргийлэх санамж, зөвлөмжийг үйлчилгээний зааланд байршуулсан, 58 нь ажлын байр, тоног төхөөрөмж, багаж хэрэгслийг угааж, цэвэрлэн, халдваргүйжүүлж хэвшсэн, 48 нь ажилчдыг ажлын байранд нэвтрэхээс өмнө биеийн халууныг хэмжиж, тандалт хийн, амны хаалт зүүлгэн, гарыг халдваргүйжүүлж хэвшжээ.
Шалгалтаар давхардсан тоогоор 112 дутагдал илэрсэн бөгөөд Баянзүрх дүүргийн “Эс пи сервис” ХХК-ийн “Банана”, “S-13”, Ундарга ХХК-ийн “Венус, “Лха чөдөр” ХХК-ийн “Лха”, “Бөртэ гүнж” ХХК-ийн “Казино баар”, “Тэнгэрлэг интернэшнл” ХХК “Вэст” диско баар, “Баясах оюу” ХХК “Рич” диско баар, “Гэрэлт од халиун” ХХК “888”, “Ингэнэ хөөвөр” ХХК “Орбит “диско баарууд мэргэжлийн байгууллагаас хүргэсэн короновируст халдвар/COVID-19/-аас урьдчилан сэргийлэх талаархи зөвлөмж, шаардлагыг бүрэн хэрэгжүүлээгүй, эрүүл ахуйн зохистой дадлын мөрдөлт хангалтгүй гарчээ.
Тухайлбал, өдөр бүр ажилчдыг ажлын байранд нэвтрэхээс өмнө биеийн халууныг хэмжиж, тандалт хийсэн бүртгэлгүй, ажилчдаас халдварт өвчтэй хүн асарсан, хавьтал болсон тусгаарлалтаас гарсан хүн гэр бүлд хамт байгаа талаар асуумж авч бүртгээгүй, ажлын байрны агааржуулалт хангалтгүй, тусгай зөвшөөрөлтэй мэргэжлийн байгууллалагаар ажлын байранд халдваргүйжүүлэлт хийлгээгүй, үйлчилгээнд хэрэглэгдэж байгаа аяга, таваг, үйлчилгээний хоолны хэрэгслийг зааврын дагуу угааж, ариутгадаггүй, өдөр тутмын цэвэрлэгээнд мэргэжлийн байгууллагаас зөвлөсөн үр дүнтэй халдваргүйжүүлэх бодис хэрэглээгүй, нөөц бүрдүүлээгүй байна.
