Халдварт цар тахлын улмаас дэлхий дахинаа хязгаарлалт, хөл хорио тогтоогдоод байгаа хэдий ч Олон улсын атомын энергийн агентлаг (ОУАЭА)-аас цөмийн болон цацрагийн аюулгүй байдлыг хангуулах чиглэлээр олон талт арга хэмжээнүүдийг хэрэгжүүлэн, хурал, техникийн уулзалт, сургалт, семинаруудыг цахим хэлбэрээр зохион байгуулж гишүүн орнууддаа дэмжлэг туслалцаа үзүүлсээр байна. Эдгээр арга хэмжээний нэг нь 2020 оны 09 дүгээр сарын 29-ний өдрөөс эхлэн цахим хэлбэрээр зохион байгуулагдаж буй “Шинэ үеийн цөмийн реакторууд ба ослын үеийн бэлэн байдал, хариу арга хэмжээ” сэдэвт техникийн уулзалт юм.

Энэхүү техникийн уулзалт нь шинэ үеийн (IV generation) реакторуудын суурилуулалт, ашиглалтын үеийн эрх зүйн орчин, ажиллах зарчим, тавигдах шаардлага, цацрагийн хамгаалалт, аюулгүй байдал, аюулгүй ажиллагаа, ослын бэлэн байдал, хариу арга хэмжээний талаар өргөн хүрээтэй мэдлэг мэдээллийг оролцогсдод олгож байгаагаараа чухал ач холбогдолтой. Энэ үйл ажиллагаанд МХЕГ-ын Цөмийн болон цацрагийн аюулгүй байдлын хяналтын газрын нэг улсын байцаагч оролцож байна.

Мэргэжлийн хяналтын байгууллага нь ОУАЭА-аас гаргасан удирдамж, зөвлөмж болон Цөмийн энергийн тухай хууль, Гамшгаас хамгаалах тухай хуульд нийцүүлэн “Мэргэжлийн болон цацрагийн хяналтын улсын албаны төлөвлөгөө”, “Цацрагийн осол, хордлогын үед мэдээлэл солилцох, хариу арга хэмжээг зохион байгуулан ажиллах заавар” зэрэг баримт бичгүүдийг боловсруулан хэрэгжилтэд нь хяналт тавин ажиллаж байна. Мөн энэ оны эхээр холбогдох мэргэжлийн байгууллагуудын хамтран боловсруулсан “Цацрагийн ослоос хамгаалах улсын төлөвлөгөө”-ний төслийг Засгийн газрын хуралдаанаар хэлэлцүүлэхээр Цөмийн энергийн комисс шийдвэрлэсэн.