Дорноговь аймгийн Улаанбадрах сумын Ураны үйлдвэр орчимд шинжилгээ хийсэн ажлын баг өнөөдөр дүгнэлтээ танилцуулсан. Тодруулбал, ЗГХЭГ-ын даргын тушаалаар Дорноговь аймгийн Улаанбадрах сумын нутаг дэвсгэрт үйл ажиллагаа явуулж байгаа “Бадрах энержи” компанийн орчимд ураны шинжилгээ хийхэд ураны цацрагийн хэмжээ зарим цэг дээр их байдаг.

Гэвч тэр цэгээс 10-100 метр холдоход цацраг байгалийн, энгийн хэмжээндээ очиж буурдаг. Тиймээс тус суманд уранаас шалтгаалан хүн амын эрүүл мэндэд сөрөг нөлөөлөл бий болж байгаа нь тогтоогдоогүй. Энэ онд хоёр удаагийн ургийн гажиг төрөлт илэрсэн нь цацрагаас үүдээгүй. Дорноговь аймгийн төлийн гажиг бусад аймгуудтай адил. Уранаас шалтгаалж ургийн гажиг төрж байгаа нь тогтоогдоогүй гэдгийг ажлын хэсгийнхэн мэдээлсэн.

Тэгвэл "Машинтай жагсаал" хөдөлгөөн, "Эвийн хүч, эх нутгийн төлөө" ТББ-ынхан  яг одоо Ургах наран хорооллын замд мутацад орсон гэх зургаан хөлтэй ямаануудаа нядалж, олон нийтэд дотор гэдэс нь хэрхэн өөрчлөгдсөн байгааг харуулж байна.

https://www.facebook.com/429242561241012/videos/987575338426438

Тэд эрүүл байх магадлалтай хонь, ямаа болон мутацад орсон гэх зургаан хөлтэй ямаануудын дотор гэдсийг харьцуулан харуулж байгаа юм. "Машинтай жагсаал" хөдөлгөөн Б.Цэгмэдийн мэдээлж буйгаар нядалж буй малын уушиг, элэг нь жижиг цэвэрүүтэй, хавдар үүссэн, элэг нь өрцөндөө наалдаж, хатсан, хэмжээ нь жижгэрсэн байна гэдгийг тодотгосон. 

Дээрх малын дотор эрхтэнг газар дээр нь харж буй хэвлэл мэдээллийнхэн болоод иргэд "малын дотор эрхтэн ямар нэгэн байдлаар өөрчлөлттэй байна гэдгийг хэлж байна. 

Нядалсан малын дотор эрхтэнг улсын Мал эмнэлгийн газрын лабораторит шинжлүүлэх юм байна. Газар дээр нь Мал эмнэлгийн газрын мэргэжилтэн, Эрүүгийн цагдаагийн газрын байцаагч хяналт тавьж байна.