Эрүүл мэндийн яамны ээлжит мэдээллийн үеэр ГХЯ-ны Консулын газрын дарга Л.Мөнхтүшиг энэ сард хийгдэх нислэг болон бусад асуудлын талаар мэдээлэл өглөө. 

Тэрбээр “Өнөөдрийн байдлаар гадаадын 81 улсаас 23054 иргэнийг эх оронд нь авчраад байна. Энэ сард нийт 11 удаагийн нислэг үйлдэнэ. Эхний ээлжийн нислэг Нурсултан руу амжилттай хийгдсэн. Бид Гадаадад байгаа элин сайдын яамдуудаар дамжуулан нутаг буцах хүсэлтэй иргэдийнхээ тоон мэдээллийг авч байгаа.

Өнөөдрийн байдлаар нэн яаралтай ирэх шаардлагатай 3000 орчим иргэн байна. Үүний дийлэнх нь буюу 2500 орчим нь БНСУ-д байна. АНУ-д 205 хүн, европ болон бусад бүс нутагт 490 орчим иргэн байна.

Энэ сарын нислэгүүдээр нийт 2760 иргэнийг авчирна гэж тооцсон. Сарын сүүлээр яаралтай буцах иргэдийн тоо буурна гэж үзэж банйа. Хүйтний улирал эхэлж байгаатай холбогдуулан тусгай үүргийн нислэгээр ирж байгаа иргэдийг задгай талбайд буулгах ажлыг зогсоосон.

Цар тахлаас урьдчилан сэргийлэх ажлын хүрээнд нэгдүгээр сарын 27-оос эхлэн богино хугацааны бүх төрлийн виз олгохыг зогсоогоод байсан. Тэгвэл УОК-оос нэн шаардлагатай ирэх хүсэлтэй албаны болон бизнесийн шугамаар ирэх гадаадын иргэдэд богино хугацнааны виз олгох зөвшөөрөл өглөө. Ингэхдээ 21 хоног тусгаарлах байранд байрлуулах, дахин 30 хоногоор нэг удаа визээ сунгах эрхтэй" гэлээ.

Энэ ажлыг өнөөдрөөс эхлэн хэрэгжүүлж эхэллээ. Албан ажлын шугамаар ирэх хүсэлтэй гадаадын иргэнийг тухайн газрын Консулын газар бичгээр гаргах юм.

А.Сүх