НМХГ-аас төрийн болон төрийн өмчийн бус сургуулиудад “Үдийн цай” хөтөлбөрт хийсэн хяналт шалгалтын талаар мэдээлэл өглөө.

Төлөвлөгөөт хяналт шалгалтад 275 сургуулийг хамруулахаар төлөвлөснөөс 237-д нь шалгалт хийжээ.

Шалгалтаар 450 арчдас, ундны усанд 75 сорьц, хоолны ислэг, хүнсний бүтээгдэхүүний 30 дээж авч шинжилсэн байна.

Нийслэлд үйл ажиллагаа явуулж байгаа төрийн өмчийн нийт 138 сургууль байгаагаас 74 хувь нь зориулалтын үлдсэн нь зориулалтын бус цайны газартай байна. Харин төрийн бус өмчийн 117 сургуулийн 23 хувь нь л зориулалтын цайны газартай байна. Тухайлбал, төрийн өмчийн Хан-Уул дүүргийн 7, 10, 15, 32, 34 сургууль, Чингэлтэй дүүргийн 117, 17, Сонгинохайрхан дүүргийн 34, Баянзүрх дүүргийн 53, 79 сургуулиуд зориулалтын бус цайны газартай байна.

НМХГ-ын Хүнсний чанар, хяналтын улсын ахлах байцаагч Б.Хонгор “Сургуулийн орчинд худалдаалахыг хориглосон хүнсний түүхий эдийн жагсаалт байдаг. Хяналт шалгалтаар худалдаалах хориотой бүтээгдэхүүн худалдаалж Баянгол дүүргийн 20, Баянзүрх дүүргийн 79, 27 дугаар сургууль зэрэг зургаан сургуульд илэрсэн. Мөн хүүхдүүдэд хоолыг олгох зөвшөөрөгдсөн температур гэж бий.

Тухайлбал, хуурай хоолыг 65 температурт, шөлтэй хоолыг 75 градуст хүргэх ёстой. Хөрсөн хоол хүүхдэд өгснөөр хүүхдийн бие хямардаг.

Ийм зөрчил гаргасан Сонгинохайрхан дүүргийн “Ирээдүй” цогцолбор, Чингэлтэй дүүргийн  37, Баянгол дүүргийн “Жишиг Эрдэм”, Гёте, 115, 111 зэрэг 26 сургуульд ийм зөрчил илэрсэн” гэлээ.

А.Сүх