Гэр хорооллын айл өрхийн шөнийн цахилгааны төлбөрийг 100 хувь хөнгөлөхөөр болжээ. Тодруулбал, аймгийн төв, арван мянгаас дээш хүн амтай сум суурин газрын агаарын бохирдлыг бууруулах, айл өрхөд санхүүгийн дэмжлэг үзүүлэх зорилгоор гэр хорооллын айл өрхийн эрчим хүчний тарифын хөнгөлөлт үзүүлдэг байсан билээ. Тус журамд өөрчлөлт оруулан 50 хувиар хөнгөлж байсныг 100 хувиар тооцож хөнгөлөлт үзүүлэх шийдвэр гаргасан байна. Эдгээр айл өрхийн цахилгааны тарифын хөнгөлөлтөд 4.7 тэрбум төгрөг зарцуулагдана гэж тооцсон болохыг Эрчим хүчний зохицуулах хорооноос мэдээллээ. 

Энэхүү журам хэрэгжиж эхэлснээр Улаанбаатар хотод 117 мянган айл өрх, 21 аймгийн төв, Сэлэнгэ аймгийн Мандал, Өвөрхангай аймгийн Хархорин, Дорноговь аймгийн Замын-Үүд зэрэг 10 мянгаас дээш хүн амтай сум, суурин газруудад 72 мянган айл өрх, нийт 189 мянган гэр хорооллын айл өрх 100 хувийн цахилгааны тарифын хөнгөлөлтөд хамрагдах боломжтой болж байгаа аж. 

Дашрамд өгүүлэхэд, шөнийн цагт хэрэглэсэн цахилгааны тарифт Төв, Зүүн, Өмнөд, Баруун бүс болон Алтай-Улиастайн бүсийн эрчим хүчний системийн нэгдсэн сүлжээнд холбогдсон гэр хорооллын тарифт тоолууртай өрхийн 1, 2, 3, 11, 12 дугаар саруудын оройн 21:00 цагаас өглөөний 06:00 цагийн хооронд хэрэглэсэн цахилгааны тарифт хөнгөлөлт үзүүлж байгаа юм.