2016 онд олуулаа УИХ-ыг бүрдүүлсэн МАН-ынхан жилийн дараа хоорондоо нанчилдаж 32:33-аараа хуваагдчихсан. Мэдээж, цөөхүүлээ нь М.Энхболдын тал, олон тоотой нь У.Хүрэлсүхийн тал байсан. Сүүлд “Жаран тэрбумынхан”, “ЖДҮ-гийнхэн” гэдэг болсон.

Бие биеэ нудрахаас нааахнуур муудалцаж явсан энэ хоёр бүлэглэлийнхэн сүүлийн үед “жиг” ургуулж, жигтэйхэн ойр байх болов.

У.Хүрэлсүх, М.Энхболд хоёр уулзлаа гэдэг яриа улс төрийн хүрээнд гарсан. “Миеэ дарга Хянгаа ажилд томилуулахаар Хүрэлсүхтэй ярьжээ” гэх мэдээлэл бас гарсан.

Удалгүй энэ яриа үнэн болж Д.Хаянхярваа арваад хоногийн өмнө “Эрдэнэс Монгол” ХХК-ийн захирлаар томилогдсон юм.

“Эрдэнэс Монгол” ХХК бол том оо том. Энэ компани “Эрдэнэс Тавантолгой” ХК, “Эрдэнэс Оюутолгой” ХХК, “Багануур”” ХК, “Шивээ-Овоо” ХК, “Мон-Атом” ХХК, “Эрдэнэс Шивээ Энержи” ХХК, “Эрдэнэс Метан” ХХК, “Эрдэнэс Ассет Менежмент” ХХК-иудын 50 буюу түүнээс дээш хувийн хувьцааг эзэмшдэг гээд бод. Мөн “Оюу толгой” ХХК-ийн Монголын талын 34 хувийг өөрийн охин компаниар дамжуулан эзэмшиж,  Тавантолгой -Гашуунсухайт чиглэлийн авто замын ашиглалт, засвар үйлчилгээг хариуцан ажилладаг “Гашуун Сухайт Авто Зам” ХХК-ийг төр, хувийн хэвшлийн түншлэлийн үндсэн дээр байгуулан ажиллуулдаг.

Д.Хаянхярвааг ажлаа авахын өмнөхөн М.Энхболд даргад нь таагүй явдал тохиолдов. 2020 оны есдүгээр сард МАН-ын дарга асан М.Энхболдод холбогдох “Жаран тэрбум”-ын хэргийг Нийслэлийн прокурорын газраас сэргээжээ.

Өмнө нь тусгаарлагдаж үлдээд байсан хэргээрээ М.Энхболд лав нэг удаа байцаалт өгсөн байна. “Улс төрд мөнхийн нөхөрлөл, бас мөнхий дайсан гэж байхгүй” гэсэн үг бий.

Сүүлийн жилүүдэд энэ үгийн үнэн бодитой юм гэдгийг улстөрчид, улс төрийн хүрээнийхэн байтугай жирийн иргэд ч иймэрхүү явдлаас мэдрэх болов.

Эх сурвалж: aguulga.mn