Монгол Улсаас ӨМӨЗО-ны Хөх хотод сууж байсан ерөнхий консул асан Д.Мөнх-Эрдэнийг эрх мэдлээ ашиглаж, дипломат дугаартай автомашинаа өмнөд хөршийн иргэнд худалдсан үндэслэлээр АТГ-ын Мөрдөн шалгах хэлтсээс шалгаж эхэлжээ. Түүнийг яллагдагчаар татах эсэх нь шинжээчийн дүгнэлтийн хариунаас тодорхой болох аж.

Д.Мөнх-Эрдэнэ энэ тухайгаа “Монгол Улсаас гадаадад улсад суугаа дипломат төлөөлөгчийн газрын төлөөлөгч нь татваргүйгээр автомашин оруулж, унах эрхтэй. Венийн конвенцод заасан энэ эрхээ эдэлж БНХАУ-руу автомашин оруулсан. Гэхдээ би Монголоос аваачсан “Range Rover” маркийн автомашинаа бусдад шилжүүлсэн, зарсан асуудал байхгүй.

Энэ нь миний албан тушаалд санаархсан хүмүүсийн гүтгэлэг. Би буруу зүйл хийсэн бол хариуцлагаа хүлээхэд бэлэн” хэмээж байсан билээ. Гэтэл хууль хяналтынхны шалгалтаар тэрбээр Хөх хот дахь Консулын газрын албан хэрэгцээнд ашиглах нэрийдлээр автомашинууд оруулаад нэгийг нь өвөрмонгол иргэнд зарсан аж.

Мөн бас нэг “Лексус-570” автомашиныг нь Хөх хотын консулынхан битүүмжлээд байгаа аж. Д.Мөнх-Эрдэнийг эрх мэдлээ ашиглан өмнөд хөршийн татвараас зайлсхийж, албан хэрэгцээнд ашиглах нэрийдлээр автомашинуудыг оруулж ирэн бусдад зарж, борлуулсан хэрэгт буруутган, ийнхүү АТГ-аас шалгаж эхэлжээ.

У.Тэргэл