Цагдаагийн ерөнхий газрын даргаар томилогдоод удаагүй цагдаагийн хурандаа Ж.Болдод хошууч генерал цол олгохыг Засгийн газрын өчигдрийн хуралдаанаас дэмжлээ. Улмаар Засгийн газраас тогтоол баталж, Ерөнхийлөгч Х.Баттулгад уламжлахаар тогтлоо. Ерөнхийлөгч тогтоолыг хүлээн авч, цол олгох зарлиг гаргах учиртай.  Цагдаагийн хурандаа Ж.Болд тэгвэл Монгол Улсын 108 дахь хошууч генерал цолтон болох юм.

Монгол Улсаас нийт 181 генерал төрөн гарсан байдаг. Тэднээс маршал гурав, армийн генерал хоёр, хурандаа генерал найм, дэслэгч генерал 18, хошууч генерал 107, бригадын генерал цолтон 28 байдаг аж.

Өнөөдрийн байдлаар 36 генерал төрийн алба хашиж байгаа ба Монгол Улсын баатар, маршал Ю.Цэдэнбал 28 насандаа дэслэгч генерал болсноороо түүхэн дэх хамгийн залуу генералд тооцогддог.

Цагдаагийн хурандаа Ж.Болд нь 1996-2001 он хүртэл Хэнтий аймгийн Цагдаагийн газарт мөрдөн байцаагчаар ажиллаж байсан. 2002-2014 онд Мөрдөн байцаах газарт ахлах мөрдөн байцаагч, Чиглэлийн ахлах мөрдөн байцаагч, Зохион байгуулалттай гэмт хэрэг мөрдөх хэлтэст мөрдөн байцаах тасгийн дарга, 2014 оноос 2015 оны арваннэгдүгээр сар хүртэл Зохион байгуулалттай гэмт хэрэгтэй тэмцэх газарт тасгийн дарга, Хар тамхи, мансууруулах бодистой холбоотой хэрэгтэй тэмцэх хэлтэст Мөрдөн байцаах тасгийн даргаар ажиллаж байжээ. Мөн 2015-2017 онд Эрүүгийн цагдаагийн газрын Хар тамхитай тэмцэх хэлтсийн хоёрдугаар тасагт Мөрдөн байцаах тасгийн дарга, 2017 оны гуравдугаар сараас Эрүүгийн Цагдаагийн албаны Зохион байгуулалттай гэмт хэрэгтэй тэмцэх хэлтсийн хоёрдугаар тасагт мөрдөх тасгийн дарга, 2017 оны зургаадугаар сараас Хэнтий аймаг дахь Цагдаагийн газрын даргаар томилогдон ажиллаж байжээ.

Ж.Болд нь Хэнтий аймаг дахь Цагдаагийн газрын дарга, ЦЕГ-ын дэд даргаар ажиллаж байгаад өнгөрсөн долоодугаар сард Дотоодын цэргийн командлагч болоод ЦЕГ-ын даргаар томилогдсон билээ. Тэрбээр хуульч, эрхзүйч, төрийн удирдлагын менежер мэргэжилтэй ба хууль зүйн ухааны магистр, докторант юм.

У.Тэргэл