Эрүүл мэндийн яамнаас ээлжит мэдээллээ хийлээ.

 ХӨСҮТ-ийн дарга Д.Нямхүү "Энэ сарын 22, 23-нд 1053 хүнд шинжилгээ хийснээс нэг хүний сорьцод коронавирус илэрлээ. Тэрбээр Монгол Улсын иргэн бөгөөд энэ сарын 20-нд Алтанбулагийн боомтоор орж ирсэн ачаа тээврийн жолооч гэлээ. Цаашлаад тэрбээр амьсгалын замын томуугийн шинж тэмдэг илэрсэн хүмүүсээс коронавирусний шинжилгээ авч байгаа ба санамсаргүйгээр 31 хүнээс шинжилгээ авахад коронавирус илрээгүй гэлээ.

Ийнхүү Монгол Улсад баталсан тохиолдол 328 боллоо. Үүнээс 312 хүн эдгэрч, 16 хүн ХӨСҮТ-д эмчлүүлж байгаагаас 12 нь хөнгөн, дөрвийнх  нь бие хүндэвтэр байгаа аж. 

Тусгаарлалтад байгаа иргэнээс 20 дахь хоног дээр нь коронавирус илэрсэн гэсэн мэдээлэл гарсан нь үнэн. Сиатлын онгоцоор ирсэн нэг иргэнээс 20 дахь хоног дээрээ коронавирус илэрсэн. Тухайн иргэн аравдугаар сарын 1-нд эх орондоо ирсэн ба аравдугаар сарын 2-ны шинжилгээгээр хариу нь сөрөг гарсан. 13 дахь хоногийн шинжилгээгээр бас сөрөг гарсан ч гуравдахь буюу сүүлчийн шинжилгээг хийхэд 20 дахь хоног дээрээ коронавирус илэрлээ. Энэ хүнийг ХӨСҮТ-ийн тасагт шилжүүлж, эмчилгээг эхлүүлээд байна гэлээ.

Дэлхийд нийт 41.1 сая хүн коронавирусний халдвараар өвчилжээ. Үүнээс 31.1 сая нь эдгэрсэн бол 1.1 сая гаруй хүн нас барсан байна. Сүүлийн нэг хоногт 423 мянган хүн шинээр өвчилсөн байна" гэлээ.