Монгол Улсад циркийн урлаг үүсэж, хөгжөөд 79 жил, Циркийн сургууль байгуулаад 80 жил болжээ. Дэлхийг нэгэн үе шуугиулж байсан Монголын циркийн барилгыг 13 жилийн өмнө хувьчилснаас хойш циркийн урлагийн бодлого алдагдаж, залгамж халаа нь бэлтгэл хийх  байргүй, жүжигчид нь цалингүйгээс өөрсдийгөө ажлын байраар хангаж, тус бүрдээ студи, продакшн болж хуваагдан оршин тогтнохоос аргагүй болжээ.

Хуучин циркт 300 циркчин тулгамдсан энэ асуудлаар мэдээлэл хийлээ. Тэд дараах хоёр шаардлагыг Соёлын яам болон Засгийн газарт хүргүүлж буйгаа мэдэгдлээ. Үүнд, Монгол Улсын Консерваторийн хашаанд байгаа газар дээр, хийлгэсэн зураг төслийн дагуу Циркийн сургуулийн барилгыг яаралтай барьж өгөх. Циркчдийн соёлын өв болсон Хуучин циркийн барилгыг шинэчлэн ордон барьж өгнө үү. Түүнчлэн засварласныхаа дараа Монголын үндэсний цирк ямар бодлого баримтлан, хэрхэн ажиллах талаар албан ёсоор тайлбар авахыг хүсэж, албан бичиг хүргүүлж байгаа гэлээ. Энэхүү шаардлагууд амин чухал учраас Засгийн газар хүлээн авна гэж найдаж байна гэж Монголын мэргэжлийн циркчдийн нэгдсэн холбооноос мэдээллээ.

Хуучин циркийн барилга 2015 онд галд өртөж, улмаар МХЕГ-аас акталжээ. Иймээс Монгол Улсын Консерваторийн Бүжиг циркийн сургуулийн Циркийн тэнхмийн сурагчид майхан циркт бэлтгэл хийж байсан ч хүйтэрсний улмаас цаашид энэ байдлаар бэлтгэл хийх боломжгүй болсон байна. Түүнчлэн 1971 онд ашиглалтад оруулсан зориулалтын барилгыг хувьчилж авсан байгууллага нь шинэчилж байна гэх нэрийдлээр үндсэн хийцийг нь өөрчилж буйд уран бүтээлчид зовниж буйгаа хэлж байна.  

Монголын мэргэжлийн циркчдийн нэгдсэн холбооны гүйцэтгэх захирал МУСТА, Т.Буд "Бидэнд төлөвлөгөө, боловсон хүчин, багш нар хангалттай байна. Япон, Парист манай уран нугаралтын сургалт явж байна. Циркийг биеийн тамирын жижиг танхимд хийх ямар ч боломжгүй. Бид 13 жил хүлээлээ. Жилийн өмнө циркчдийн нэгдсэн зөвлөгөөнийг хийсэн.Соёлын сайдыг циркийн ажлыг улам эрчимжүүлж өгөхийг хүсэж байна. Яамтай болсон учраас яамны зүгээс авах арга хэмжээг л хүлээж байна” гэв. 

Циркийн тэнхимийн зөвлөх багш хүндэт профессор У.Энхбаяр "Циркийн амьтан сургах үйл явц бол яргалал мэт хэвлэл мэдээллийн зарим хэрэгслээр буруу ойлголт төрүүлж байна. Амьтанг сургахын тулд ээж шиг нь ханддаг. Улсын Үндэсний АСА циркэд манеж байхад бид тэвчээртэй хүлээж байлаа. Одоо үнэхээр эгдүүцэж байна. Цирк мэдэхгүй хүнтэй ярилцаад циркчдийг тэгж дүгнэж болохгүй.